ޕާކިސްތާންގެ ތާލިބާން ޖަމާއަތާމެދު ގޮތެއް ނިންމާނީ އަފްޣާނިސްތާނުން ނޫން ކަމަށާއި އެކަމާ މެދު ގޮތެއް ނިންމާނީ ޕާކިސްތާނުން ކަމަށް ތާލިބާންގެ ތަރުޖަމާން ބުނެފިއެވެ. ތަހްރީކޭ ތާލިބާނޭ ޕާކިސްތާނުން ކުރަމުން ދާ ހަނގުރާމއަކީ ޖާއިޒު ހަނގުރާމައެއްކަން ނުވަތަ ނޫންކަން ކަނޑައަޅާނީ، ޕާކިސްތާނު ސަރުކާރުންނާއި ޕާކިސްތާންގެ ދަންނަބޭކަލުން ކަމަށް ޖިއޯ ޓީވީގައި ވާހަކަ ދައްކަމުން ޒަބީޙުﷲ މުޖާހިދު ބުންޏެވެ.
މުޖާހިދު ބުނެފައި ވަނީ އެއްވެސް ގައުމަކަށް ހަމަލަދޭން ނުވަތަ އެއްވެސް ގައުމެއްގެ ސުލްޙަ ނަގާލުމަށް ހަމަލަދޭން އަފްޣާނިސްތާންގެ ފަސްގަނޑު ބޭނުން ކުރުމަށް އެއްވެސް ފަރާތަކަށް ތާލިބާނުން ފުރުސަތު ނުދޭނެ ކަމަށެވެ.
އޭނާ ބުނިގޮތުގައި ޕާކިސްތާންގެ ތާލިބާން ޖަމާއަތުން ދެކެނީ އަފްޣާން ތާލިބާން އަކީ އެމީހުންގެ ލީޑަރުން ކަމަށެވެ. އެހެންވީއިރު ޕާކިސްތާނު ތާލިބާނުން އަފްޣާނިސްތާންގެ ތާލިބާނުން ބުނާ ބަސް އަހަން ޖެހޭނެއެވެ.
ތާލިބާނުން ހިފި ސަރަހައްދުތަކުގެ ޖަލުތަކުން އެމީހުން ވަނީ ތަޙްރީކޭ ތާލިބާންގެ ޓެރަރިސްޓް ޖަމާއަތުގެ މީހުން މިނިވަން ކޮށްފައެވެ. ޖިއޯއިން ސުއާލު ކުރުމުން މުޖާހިދު ބުނެފައި ވަނީ، ތާލިބާނުން ދާދި އަވަހަށް ސަރުކާރެއް އެކުލަވާލާނެ ކަމަށެވެ.
