އަފްޣާނިސްތާންގައި ބޮޑު ބައްޔަކުން ބަލި ކުރެވިފައިވާ އެމެރިކާ، ތާލިބާނުންގެ އިންޒާރާއެއް ގޮތަށް އިއްޔެ އެންމެ ފަހު ފްލައިޓްގައި ސިފައިން ބޭރުކޮށްފިއެވެ. ޓެރަރިސްޓް ޖަމާއަތް، ތާލިބާނުގެ ވެރިކަން ވައްޓާލުމަށް އެމެރިކާ، މީގެ 20 އަހަރު ކުރިން އަފްޣާނިސްތާނަށް ވަދެ ކޮށްފައިވާ ހަނގުރާމަ ނިންމާލައި، އެގައުމުން ފައިބައިގެން ދިޔައީ ތާލިބާނާ ވެރިކަން ޙަވާލު ކޮށްފައެވެ. އަދި އޭގެ އިތުރުން ގިނަ އަދަދެއްގެ މޮޅު ހަތިޔާރުވެސް ތާލިބާނާ ޙަވާލުކޮށްފައެވެ. ތާލިބާނަކީ މިހާރު ދުނިޔޭގައި އޮތް އެންމެ ބާރުގަދަ އަދި އެންމެ މުއްސަނދި ޓެރަރިސްޓް ޖަމާއަތެވެ.
31 އޮގަސްޓަށް އެމެރިކާ ސިފަައިން އަފްޣާނިސްތާނުން ފައިބައިގެންދާން ޖެހޭނެކަމަށާއި މުއްދަތު އިތުރު ކުރެވެން ނެތް ކަމަށް ތާލިބާނުން އެންގި އެންގުމަށް އެމެރިކާ ވަނީ ބޯލަނބާފައެވެ. އިއްޔެ ޙާމިދު ކަރްޒާއީ އިންޓަރނޭޝަނަލް އެއަރޕޯޓުން ފުރައިގެން ދިޔައީ އެންމެ ފަހުގެ ތިން ފްލައިޓެވެ. މީގެ ތެރޭން އެންމެ ފަހު ފްލައިޓް ނައްޓާލީ އަފްޣާނިސްތާން ގަޑިން 3.29ގައެވެ.
އެމެރިކާ ސިފައިން ފައިބައިގެން ދިއުމުގެ އުފަލުގައި ތާލިބާނުން ވަނީ ވައިގެ ތެރެއަށް ބަޑިޖަހައި އުފާ ފާޅުކޮށްފައެވެ.
ތާލިބާނުން ބޭރުކުރުމަށް އެމެރިކާއިން މަންދޫބަކަށް ފޮނުވި، އަފްޣާނިސްތާނުގެ ދަރިކޮޅުގެ އެމެރިކާގެ ރަށްވެއްސެއްކަމަށްވާ ޒަލްމާއޭ ޚަލީލު ޒާދު ވަނީ އެމެރިކާ ސިފައިން ފައިބައި ނިމުނީކަމަށް އިޢުލާން ކުރައްވާފައެވެ. ތާލިބާނާ ވެރިކަން ޙަވާލުކުރުމުގެ މޭސްތިރިއަކީވެސް ޚާލީލުޒާދެވެ.
ޗައިނާއިން ބުނެފައިވާ ގޮތުގައި މިހާރު ފެނިގެން މިދަނީ އެމެރިކާގެ ހައިބަތާއި ބާރު ދުނިޔެއިން އޮއްސެމުންދާ ތަނެވެ.
