ސްކޫލުތަކުގައި މަޖުބޫރުކޮށްގެން ޗައިނާ ބަސް ބޭނުން ކުރުމުގެ ސިޔާސަތަށް ގޮން ޖެހި ޓިބެޓްގެ ދެ ޒުވާނަކު ޗައިނާ ފުލުހުން ހައްޔަރުކޮށްފިއެވެ. ޓިބެޓްގެ ގުއޯލުއޯ ސަހަރުން ހައްޔަރުކޮށްފައިވާ އުމުރުން 19 އަހަރުގެ ދެ ޒުވާނުން ހައްޔަރު ކުރީ ޗައިނާ ބަސް ސްކޫލުތަކުގައި ކިޔަވައި ދިނުމާ ދެކޮޅަށް ވީޗެޓްގައި މި ދެމީހުން ވާހަކަ ދެއްކުމާ ގުޅިގެންނެނެވެ.
ހިސާބު ގަނޑުގެ މީހަކާ ޙަވާލާދީ ރޭޑިއޯ ފްރީ އޭޝިއާއިން ބުނިގޮތުގައި މި ދެކުދިން ވަނީ މިހާރު ފުލުހުންގެ ބެލުމުގެ ދަށުގައެވެ.
ސެޕްޓެމްބަރު އެއްވަނަ ދުވަހުން ފެށިގެން ޒާތީ މިނިވަންކަން ދީފައިވާ ޓިބެޓްގައި ހުރިހައި ސްކޫލެއްގައި ކިޔަވައިދޭނީ ޗައިނާ މެންޑެރިން ބަހެވެ. މި މުއްދަތަށްފަހު، ޓިބެޓްގެ ބަހުން ލިޔެފައިވާ ޓެކްސްޓް ފޮތްތަކާއި ސްކޫލުގައި އެ ބަހުން ކިޔަވައި ދިނުން މަނާވާނެއެވެ.
ސަރުކާރުން މީހުންނށް އަންގާފައި ވަނީ ކޮވިޑް ވެކްސިން ޖައްސަން ދާއިރު ސްކޫލު ޓެކްސްޓް ފޮތްތައްވެސް ލިބިގަތުމަށެވެ.
ޓިބެޓް މީހުން ދަނީ ވަކި އިންތިޒާމެއްގެ ތެރޭން ޗައިނާއިން ޓިބެޓްގެ ސަގާފީ ޝަޚުސިއްޔަތު ނަގާލުމަށް ކުރަމުންދާ މަސައްކަތް ކުށްވެރި ކުރަމުންނެވެ.
