އަފްޣާނިސްތާންގައި ހިނގަމުންދާ ކަންކަމާ މެދު ޗައިނާގެ ނުތަނަވަސްކަން ހާމަވެގެން ދަނީ ޗައިނާގެ ޚާރިޖީ ވަޒީރު އެމެރިކާގެ ޚާރިޖީ ވަޒީރާ ފޯނުން ކުރެއްވި މަޝްވަރާތަކާ ގުޅިގެންނެވެ. އަފްޣާނިސސްތާންގައި ވެރިކަން ކުރާނެ ގޮތްތަކާ ބެހޭ ގޮތުން ތާލިބާނުން ވަނީ ބައިނަލްއަގްވާމީ ފެންވަރުގެ ވައުދުތަކެއް ވެފައެވެ. މިއިން އެއްކަމަކީ އަންހެނުންނާ އެމީހުން މުއާމަލާތު ކުރާނެ ގޮތާއި ނިރުބަވެރިކަން ހައްލު ކުރުމަށް އެމީހުން އަޅާނެ ފިޔަވަޅުތަކެވެ.
ޗައިނާގެ ޚާރިޖީ ވަޒީރު ވެންގ ޔީ، އެމެރިކާގެ ޚާރިޖީ ވަޒީރު އެންތޮނީ ބްލިންކެންއާ ފޯނުން ބޭއްވި މަޝްވަރާތަކުގައި އެމެރިކާއަށް ގޮވާލެއްވީ، ދެ ފުށް ގޮތް ދެއްކުމަކާ ނުލައި އަފްޣާނިސްތާންގައި ދެގައުމުން ގުޅިގެން މަސައްކަތް ކުރުމަށެވެ. ނަމަވެސް ޗައިނާއިން އެއްވެސް އެއްބާރު ލުމެއް އެމެރިކާއަށް ދޭނީ އެމެރިކާއިން ޗައިނާއަށް ދޭ އެއްބާރު ލުމުގެ މައްޗަށް ބިނާ ކޮށެވެ.
އެމެރިކާގެ ޚާރިޖީ ވަޒީރު ވިދާޅުވީ ސަލާމަތީ މަޖިލީހުގައި ބައިވެރިވާ ގައުމުތަކުން ތާލިބާނާ މެދު އެއް ގޮތް ސިޔާސަތުތަކެއް ގެން ގުޅެން ޖެހޭނެ ކަމަށެވެ.
އަންހެނުންނާއި ނިރުބަވެރިކަމާ ބެހޭ ގޮތުންނާއި އަދި ބިދޭސި ހަނގުރާމަވެރިންނާއި އަފްޣާނިސްތާނުން ބޭރުވާން ބޭނުންވާ މީހުންނަށް ތާލިބާނުން ދީފައިވާ ގެރެންޓީއަށް އިޝާރާތް ކުރައްވައި ޗައިނާ ޚާރިޖީ ވަޒީރު ވިދާޅުވީ ތާލިބާނުން އެކުލަވާލާ ސަރުކާރަކަށް މަގު ދައްކައި އެމީހުންނަށް ކަން ކުރާ ގޮތް އެމެރިކާއާއި ޗައިނާއިން ގުލިގެން ބަލަންވާނެ ކަމަށެވެ.
ޗައިނާއާއި އެމެރިކާއާ ދެމެދުގެ އެންމެ ބޮޑު ނުތަނަވަސްކަމަކަށް ވެފައި ވަނީ ކޯވިޑް19 އުފެދިގެން އައިގޮތާ ބެހޭ ގޮތުން ހޯދުމަށް އެމެރިކާއިން ކުރާ މަސައްކަތެވެ. ޗައިނާއިން މިކަމުގައި އެމެރިކާއަށްވެސް އަދި ބައިނަލްއަގްވާމީ މުޖުތަމައަށްވެސް އެއްބާރުލުން ދޭކަށް ބޭނުމެއް ނުވެއެވެ.
