އަފްޣާނިސްތާންގައި ފިލާތިބި އުއިގޫރު މުސްލިމުން ތިބީ ނުތަނަވަސްކަމެއްގައެވެ. ޕާކިސްތާންގައި އޮންނަ އުއިގޫރު މީހުންގެ ހައްގަށް މަސައްކަތް ކުރާ ޖަމާއަތަކުން ބުނާ ގޮތުގައި ޗައިނާއާއި ތާލިބާނުން ސިއްރުން ފަރުދާގެ ފުރަގަހުން ގިނަ މުއާމަލާތުތަކެއް ހިންގަމުން ގެންދެއެވެ.
އުއިގޫރު މީހުންގެ ނަސްލު ނެތިކޮށްލުމުގެ ތުހުމަތު ޗައިނާއަށް އުއިގުރު މީޙުން ކުރެއެވެ. އަދި އދއާއި އިންސާނީ ހައްގަށް މަސައްކަތް ކުރާ ޖަމާއަތްތަކުން ލަފާ ކުރާ ގޮތުގައި މިލިއަނުން އުއިގޫރު މުސްލިމުން ބަންދުކޮށްގެން ޗައިނާއިން ހަދާފައިވާ އިސްލާހިއްޔާ ހުރަގެތަކުގައި ގެންގުޅެއެވެ. މިތަންތާގައި މިމީހުންނަށް ވޭންދެނިވި އަޒާބުން އަޒާބު ދެވޭކަމަށްވެސް ރިޕޯޓް ކޮށްފައި ވެއެވެ.
ޕާކިސްތާންގައި އޮންނަ އުމަރު އުއިގޫރު ޓްރަސްޓު ޖަމުއިއްޔާއިން ބުނާ ގޮތުގައި ތާލިބާންގެ ވެރިކަމުގައި އުއިގޫރު މުސްލިމުންގެ ބިލަތްހުނި ޖަހައި އެމީހުންނަށް ފާރަލަމުން ތާލިބާނުން ދާނެ ކަމަށް ލަފާ ކުރެވެއެވެ.
މި ޖަމާއަތުން ލަފާކުރާ ގޮތުގައި ތާލިބާނަށް މި ވަގުތު މުހިންމު ވެފައިވަނީ ފައިސާއެވެ. އެހެންވެ، ޗައިނާއަށް އުއިގުރު މުސްލިމުން ވިއްކާލުމަކީ ތާލިބާނުން ކޮށްފާނެ ކަމެކެވެ.
އުމަރު އުއިގޫރު ޓްރަސްޓްގެ ތުރުކީ ތަރުޖަމާން ނިއު ޔޯރކް ޕޯސްޓާ ވާހަކަދައްކަމުން ބުނިގޮތުގައި އަފްޣާނިސްތާންގައި ސަތޭކައެއްހައި އުއިގޫރު މުސްލިމުން ދިރިއުޅެއެވެ. މިމީހުންނަށް، އަފްޣާނިސްތާނުން ބޭރުވާން ފްލައިޓަކުންވެސް ޖާގައެއް ނުލިބުނެވެ.
ތާލިބާނުން ވެރިކަން ހޯދިފަހުން އުއިގުރު 22 އާއިލާއަކުން ވަނީ ޕާކިސްތާނަށް ބޭރުވެފައެވެ.
