ތާލިބާނުން މިލިއަން ޑޮލަރުގެ ހަނގުރާމައެއް ނިންމާލީ ކޮންތާކުން ފައިސާ ހޯދައިގެންތޯ މިއީ ކުރެވޭ ވަރަށް ޖާއިޒު ސުއާލެކެވެ. އާރްއައިއޭ ނޯވީސްޓީން ވަނީ ތާލިބާންގެ ޚަޒާނާގެ ހާލަތު ދިރާސާކޮށްފައެވެ.
ތާލިބާނުން ވިއްކާ އެކސްޕޯޓް ޕްރޮޑަކްޓަކީ އަފިހޫންއާއި ހެރޮއިންއެވެ. ދުނިޔޭގެ އެންމެ ކޮލިޓީ އަފިހޫން ކޮންޓްރޯލު ކުރަނީ މި ޖަމާއަތުންނެވެ. އިތުރުން ތާލިބާނުންގެ އަތް ދަށުގައި އޮތް ސަރަހައްދުތަކުން އެމީހުން ޓެކްސް ނަގައި އުޅުނެވެ. އަދި މި ސަރަހައްދުތަކަށް ވަންނަ ލޮރީތަކާއި ލޮރީ ދުއްވާ ކުންފުނިތަކުން ރައްކާތެރިކަމުގެ ފިޔަވަޅެއްގެ ގޮތުން ސަލާމަތީ ޓެކްސްވެސް ދައްކަން ޖެހެއެވެ. ތިން ވަނަކަމަށް ޕާކިސްތާނާއި ގަލްފްގައި ދިރިއުޅޭ ތާލިބާނުންގެ މެމްބަރުންނާއި ހެޔޮއެދޭ ފަރާތްތަކުން ޗަންދާއާއި ޚައިރާތު ފައިސާ ދައްކައި ހަދައެވެ.
މި ގޮތްގޮތުން ތާލިބާނަށް އަހަރަކު، ބައި ބިލިއަން ޑޮލަރިގެ އާމްދަނީއެއް ވަންނަ ކަމަށް ނޯވޮސްޓީގެ ދިރާސާއިން ދައްކައެވެ.
ތާލިބާންގެ ތަރުޖަމާން ޒަބީޙުﷲ މުޖާހިދު ބުނެފައި ވަނީ، މަސްތުވާ ތަކެތި އުފެއްދުމާއި އޭގެ ވިޔަފާރި ކުރުމެއް ދެން ފުރުސަތެއް ނޯންނާނެ އެވެ. އަދި އޭނާ ވަނީ އަފްޣާނިސްތާނަށް ބޭރުގެ އެހީ ބޭނުންވާނެ ކަމަށް ބުނެފައެވެ.
ތާލިބާނުން 2000 ވަނަ އަހަރުވެސް މިފަދަ ވައުދެއްވިއެވެ. ތާލިބާޏުން ވެރިކަމަށް އައިސްގެން އަފިހޫންގެ ދަނޑުވެރިކަން ނައްތާލައި ދަނޑުތައް ހަލާކުކޮށްލިއެވެ. ނަމަވެސް އެމެރިކާ ސިފައިން އަފްޣާނިސްތާނަށް އަރައިގަނެ، ތާލިބާންގެ ވެރިކަން ވައްޓާލި ފަހުން އަނެއްކާވެސް އަފިހޫންގެ ދަނޑުވެރިކަމާއި މަސްތުވާތަކެތީގެ ވިޔަފާރި އާންމުވެގެން ދިޔައެވެ.
މަސްތުވާ ތަކެއްޗާ ބެހޭ އދގެގ އިދާރާ ޔޫއެންއޯޑީސީން ގިންތިކޮށްފައިވާ ގޮތުން އަފްޣާނިސްތާނަކީ، އެންމެ ގިނައިން އަފިހޫން އުފައްދާ މަރުކަޒެވެ. ނިމިދިޔަ އަހަރު އަފްޣާނިސްތާންގައި އުފެއްދި އަފިހޫންގެ އަދަދު ކުރީ އަހަރަށް ވުރެން 37 އިންސައްތައަށް އިތުރު ވެފއި ވެއެވެ. ގާތްގަނދަކަށް 263 ހެކްޓަރުގެ ބިމުގައި އަފްޣާނިސްތާނުން އަފިހޫންގެ ދަނޑުވެރިކަން ކުރެއެވެ. ޔޫއެންއޯޑީސީން ލަފާ ކުރާ ގޮތުގައި ތާލިބާނަށް މަސްތުވާތަކެތީގެ ވިޔަފާރިން އަހަރަކު ގާތްގަނޑަކަށް 400 މިލިއަން ޑޮލަރުގެ އާމްދަނީއެއް ލިބެއެވެ.
މީގެ އިތުރުން ތާލިބާނުން މައުދަންތައްވެސް ގެންގުޅެއެވެ. މިމީހުންގެ އަތްދަށުގައިވާ ސަރަހައްދުތަކުން ޗައިނާއާއި ޕާކިސްތާނާއި ޔޫއޭއީއަށް މައުދަންތައް ވަގަށް ބޭރުކޮށްގެން 460 މިލިއަނެއްހައި ޑޮލަރު ހޯދާކަމަށްވެސް ފައިނޭންޝަލް ޓައިމްސްގެ ރިޕޯޓެއްގައި ވެއެވެ.
މެއި މަހު ޔޫއެންއިން ބުނެފައި ވަނީ ތާލިބާންގެ އަހަރީ އާމްދަނީ 300 މިލިއަނާއި 1.6 ބިލއަން ޑޮލަރާ ދެމެދު އުޅޭނެކަމަށް ލަފާ ކުރާ ކަމަށެވެ. މިދިޔަ އަހަރު ތާލިބާޏުން 160 މިލިއަން ޓެކްސްގެ ގޮތުގައި ހޯދާފައިވެއެވެ.
މިއީ ތާލިބާނުން ކަޅު ބާޒާރުން ހަތިޔާރު ގަތުމަށް ބޭނުން ކުރާ ފައިސާއެވެ. އުޅަނދުތަކުގެ ގޮތުންނާއި ފަސޭހައިން ހެލިފެލި ވެވޭ ގޮތަށް ތާލިބާނުންނަކީ ވަރަށް ރިސޯސްފުލް ބަޔެކެވެ.
ބީބީސީ ރިޕޯޓަކާ ހަވާލާދީ ނޮވޮސްޓީން ބުނަނީ ތާލިބާނަށް އަހަރަކު ސައުދީ އަރަބިއްޔާއާއި ގަތަރާއި ޔޫއޭއީން ޚައިރާތުގެ ގޮތުގައި 500 މިލިއަނެއްހައި ޑޮލަރު ލިބެއެވެ.
އަފްޣާނިސްތާނަށް އެހީގެ ގޮތުގައި 4 ބިލިއަން އެމެރިކާ ޑޮލަރު އަހަރަކު ލިބެއެވެ. ނަމަވެސް މިއީ ދެން ތާލިބާންގެ ވެރިކަމުގައި ލިބޭނެ އެއްޗެއް ނޫނެވެ.
