ޗައިނާގެ ޝިންޖިއާންގައި ނިޒާމުން ގެއްލުވާލާފައިވާ އަންހެން ޓީޗަރެއްގެ އާއިލާއިން މައްސަލަ އެމެރިކާގެ މަސްއޫލުވެރިންގެ ސަމާލުކަމަށް ގެނައުމަށްފަހު ޗައިނާ މަސްއޫލުވެރިން މި އާއިލާއަށް ތުރާކޮށް، ތަހުގީގަށް މަދަމުންދާ ކަމަށް ރޭޑިއޯ ފްރީ އޭޝިއާއިން ރިޕޯޓް ކުރެއެވެ.
ގަލްބޭނޫރު ޣަނީ ވަނީ އޭނާގެ ދައްތަގެ ވީނުވީއެއް ހޯދުމުގެ ގޮތުން އެމެރިކާ މަސްއޫލުވެރިން މަސައްކަތް ކޮށްދިނުމަށް އެދި 2020ގެ ޑިސެމްބަރު ގައި ވޮޝިންޓަނުގައި ބައްދަލުވުންތަކެއް ބާއްވާފައެވެ. މި ބައްދަލުވުންތަކުގައި ކުރީގެ ޚާރިޖީ ވަޒިރު މައިކް ޕޮމްޕިއޯއާވެސް ބައްދަލު ކޮށްފައި ވެއެވެ. މި ވާހަކަ ތިލަ ވުމާއެކު ޗައިނާ މަސްއޫލުވެރިން ވަނީ ގަލްބޭނޫރުގެ އާއިލާގެ މީހުންނަށް ތުރާކުރަން ފަށާފައެވެ.
ގަލްބޭނޫރުގެ ދައްތަ ރީނާގުލް ޣަނީ އަކީ އުމުރުން 39 އަހަރުގެ މީހެކެވެ. ދެ ދަރިންގެ މަންމައަކީ ޓީޗަރެކެވެ. އޭނާގެ ބައްޕަ މަރުވެގެން އޭނާ ވަނީ ސާޅީހަށް ކިޔަވާފައެވެ. އަދި އޭނާ ގެންގުޅު ޚަތިބު ފޮތްބައި އޭނާ ވަނީ އާއިލާގެ އެހެން މީހުންނަށްވެސް ކިޔަވަން ދީފައެވެ.
ރީނާގުލްގެ ކުށަކީ، މަނާކޮށްފައިވާ ދީނީ ހަރަކާތެއް ހިންގުމާއި މާނާކޮށްފައިވާ ދީނީ ފޮތްތަކެއް މީހުންނަށް ބަހައި ހެދުމެވެ.
ރީނާ ގުލް ވަނީ ތަހުގީގަށާއި އިސްލާޙު ކުރުމަށް ޗައިނާއިން އުއިގޫރު މީހުންނަށް ހަދާފައިވާ އިސްލާހިއްޔާ ޖަލުތަކުގައި ގެންގުޅެފައެވެ. ފަހުން އޭނާގެ މައްޗަށް 17 އަހަރަށް ޖަލަށް ލާން ޙުކުމް ކުރީ އެވެ.
ޗައިނާއިން އުއިގޫރު މުސްލިމުންގެ 1.8 މިލިއަން މީހުން އިސްލާހިއްޔާ ޖަލުތަކުގައި ބަންދުކޮށްގެން އަދަބު ދޭކަމަށް ހުޅަނގުގެ ގައުމުތަކާއި މީޑިއާއިން ރިޕޯޓް ކުރެއެވެ. އދންވެސް މީކަމުގައި ނުތަނަވަސްކަން ފާޅުކޮށްފައި ވެއެވެ. ޗައިނާގެ މި ޖަލުތަކުގައި މީހުން ރޭޕްކުރާ ކަމަށާއި އަނިޔާކުރާ ކަމަށްވެސް ތުހުމަތު ކުރެވެއެވެ. ނަމަވެސް އެމެރިކާގެ ގުއަންޓަނާމޯގައި ހައްޔަރުކުރި 800އެއްހައި މުސްލިމުންނަށް ތާއަބަދު 24ގަޑިއިރު މެދު ނުކެނޑި އަނިޔާކުރި ކަމުގެ ހެކިތައް ޑޮކިއުމެންޓް ކުރެވިފައިވާ ގޮތަށް ޝިންޖިއާންގެ އަނިޔާތައް ޑޮކިއުމެންޓް ކުރެވިފައެއް ނުވެއެވެ.
