އެމެރިކާއާއި އިންޑިއާއިން ބާއްވަން ފަށާފައިވާ ޚާރިޖީ އަދި ދިފާއީ ދާއިރާގެ މަޝްވަރާތަކުގެ އައު ބުރެއް ވޮޝިންޓަނުގައި ބާއްވައިފިއެވެ. މި މަޝްވަރާތަކުގައި ދެކުނު އޭޝިއާ ސަރަހައްދާއި އިންޑިއާ ކަނޑާއި ޕެސިފިކް ކަނޑުގެ ސަރަހައްދާއި ހުޅަނގު އިންޑިއާ ކަނޑުގެ ސަރަހައްދުގެ ހާލަތާ ބެހޭ ގޮތުން މަޝްވަރާކޮށް ކަންކަން މުތާލިއާކޮށްފައި ވެއެވެ.
މި ދެ ދާއިރާއިން ދެގައުމުގެ ވަޒީރުން ބައްދަލު ކުރައްވާފައި ވަނީ 2020ގެ އޮކްޓޯބަރުގައެވެ. މިއީ އަލަށް ދެގައުމުން ފަށާފައިވާ މަސައްކަތެކެވެ. ވޮޝިންޓަނުގައި ބާއްވާފައިވާ މަޝްވަރާއާއި މުތާލިއާ ތަކަކީ، މިއަހަރުގެ ފަހުކޮޅު، ދެ ގައުމުގެ ޚާރިޖީ އަދި ދިފާއީ ވަޒީރުންގެ ބައްދަލުވުމަށް ތައްޔާރު ކުރުމުގެ ގޮތުން ބާއްވާފައިވާ މަޝްވަރާތަކެކެވެ.
ދެ ގައުމުން މި ބައްދަލުވުންތަކުގެ އެޖެންޑާގައި ހިމަނާފައި ވަނީ ދެ ގައުމުގެ ސްޓްރެޓިޖިކް ގުޅުމާއި، ދިފާއީ ގުޅުމާއި އާންމު ސިއްޙަތާ ބެހޭ ދާއިރާއާއި އިގްތިސާދާއި ވިޔަފާރިއާއި އިއާދަ ކުރަނިވި ހަކަތައާއި ސައިންސާއި ޓެކްނޮލޮޖީއާއި މޫސުމަށް އަންނަ ބަދަލުތަކާ ބެހޭ ދާއިރާތައް ދިރާސާ ކުރުމުގެ ދާއިރާތަކެވެ. މީގެ އިތުރުން ފަޒާގެ ދާއިރާގައި ގުޅިގެން މަސައްކަތް ކުރުމުގެ މަޝްވަރާތައްވެސް ހިމަނާ ފައި ވެއެވެ.
އެމެރިކާއިން ދަނީ އޭޝިއާ ސަރަހައްދުގައި އިތުބާރު ކުރެވޭ ބޮޑު ބާރެއްގެ ގޮތުގައި ބައިވެރިއެއް ހައިސިއްޔަތު އިންޑިއާއަށް ދިނުމަށް މަސައްކަތް ކުރަމުންނެވެ. ނަމަވެސް އެމެރިކާއަށް އިތުބާރު އާލާ ކުރެވެން އޮތީ އެތައް ދާއިރާއަކުން ގުޅުން ބަދަހިކޮށްގެން ކަމުން އިންޑިއާއިން ދަނީ ފުރުސަތުތައް ބަލަމުންނެވެ.
