އިންޑިއާއާއި ޖަޕާނުން ބާއްވާ އަސްކަރީ ތަމްރީންތަކުގައި އިންޑިއާއިން ބޭނުން ކުރާ ރަޝިޔާއިން އުފައްދާފައިވާ މަތިންދާބޯޓްތައް ބޭނުން ކުރާނެއެވެ. ރަޝިޔާއިން އިންޑިއާއަށް ވިއްކާފައި ވަނީ އެސްޔޫ 30 މަރުކާގެ މަތިންދާބޯޓްތަކެވެ. މިއީ ޗައިނާ ސިފައިން ޖަޕާނު ސަރަރހައްދު ކައިރިން އުދުއްސާ ވައްތަރުގެ އަސްކަރީ އުދުހޭ ބޯޓެވެ. ރަޝިޔާ ސިފައިންވެސް ޖަޕާނާ މައްސަލަ ޖެހިފައިވާ ސަރަހައްދުތަކުގައި މި ވައްތަރުގެ މަތިންދާބޯޓްތައް ބޭނުން ކުރެއެވެ.
އިންޑިއާއިން ވަނީ އެސްޔޫ 30ގެ ހަ ބޯޓެއް ޖަޕާންގެ ތަމްރީނަށް ފޮނުވާފައެވެ.
ކުއޯޑްގެ ހަތަރު ގައުމުތަކުން ދަނީ އަސްކަރީ އޮޕަރޭޓް ކުރުމުގައި ހަތަރުގައުމުންވެސް އެއްގޮތް ކަންތައްތަކެއް ގެންގުޅުމުގެ މަގްސަދުގައި ތަމްރީންތައް ބާއްވަމުންނެވެ.
ޖަޕާނުން ބުނާ ގޮތުގައި އެސްޔޫ30ގެ މަތިންދާބޯޓް އަސްކަރީ ތަމްރީންތަކުގައި ބޭނުން ކުރުމުން ޖަޕާނު ޕައިލެޓުންނަށް މި ވައްތަރުގެ އަސްކަރީ މަތިންދާބޯޓްގެ ކުޅަދާނަކަމާއި ގާބިލްކަން އެނގިގެން ދާނެއެވެ.
އިންޑިއާއާއި ޖަޕާން ސިފައިންގެ އެންމެ ފުރަތަމަ އަސްކަރީ ތަމްރީން ބާއްވާފައި ވަނީ 2018ގައެވެ. އެއަށްފަހު ތަމްރީނުތައް ބާއްވަމުން ގޮސްފައި ވެއެވެ.
