ޗައިނާގެ މިސްމީޑިއާ ކުންފުނީގެ އެންމެ ބޮޑު ޙިއްސާދާރު، އިންޑިއާގެ ޑިޖިޓަލް ޕޭމަންޓް ސިސްޓަމްގެ ބޮޑު ޙިއްސާއެއް މިލްކު ކުރުމަށް ނިންމައިފިއެވެ. ޕްރޯސަސްއިން ވަނީ އިންޑިއާގައި ޑިޖިޓަލް ޕޭމަންޓް ނިޒާމު ހިންގާ ބިލްޑެސްކް ކުންފުނީގެ ޙިއްސާތައް 4.7 ބިލިއަން އެމެރިކާ ޑޮލަރަށް ގަތުމަށް އެއްބަސްވެފައެވެ. ބިލްޑެސްކް އަކީ އިންޑިއާގައި، ޕްރޯސަސްއިން ހިންގާ ޕޭޔޫގެ މައި ވާދަވެރިޔާއެވެ. ޕްރޯސަސް އަކީ ނެދަރލެންޑްގެ ކުންފުންޏެކެވެ. އަދި މިކުންފުނީގެ މިލްކުވެރި ފަރާތަކީ، ދެކުނު އެފްރިކާގައި ރަޖިސްޓްރީ ކޮށްފައިވާ ނެސްޕާސް ލިމިޓެޑެވެ.
ބިލްޑެސްކަކީ އިންޑިއާގެ ތިން ޒުވާނަކު ބައިވެރިވެގެން 20 އަހަރު ކުރިން އުފެއްދި ކުންފުންޏެކެވެ. މިކުންފުނި ވިއްކާލުމުން މިއިން ކޮންމެ މީހަކަށް ބައި ބިލިއަން ޑޮލަރު ލިބެއެވެ.
ޕްރޯސަސްއަކީ ޗައިނާގެ މީސްމީޑިއާ ކުންފުނި، ޓެންސެންޓްގެ މައި ޙިއްސާދާރެވެ. ޓެންސެންޓްގައި، ޕްރޯސަސްގެ 29 ޕަސެންޓް ހިއްސާ އޮވެއެވެ.
ޕްރޯސަސް އިން ބުނާ ގޮތުގައި މިއަދާހަމައަށް އެކުންފުނިން ވަނީ އިންޑިއާގެ ސުމޭކް ވާސާގައި، ހަ ބިލިއަން އެމެރިކާ ޑޮލަރު އިންވެސްޓް ކޮށްފައެވެ. މި އިންވެސްޓްތަކަކީ، އިންޑިއާގެ ކާނާ ޑެލިވަރީގައި އުޅޭ ސްވީގީއާއި އެޑިއުކޭޝަން ޓެކްނޮލޮޖީގެ ކުންފުނިތަކާއި އިންޓަރނެޓް ޕްލެޓްފޯމްތަކުގައި އެކުންފުނިން ކޮށްފައިވާ އިންވެސްޓްމެންޓްތަކެވެ.
ޕްރޯސަސްއިން ބުނާ ގޮތުގައި އެކުންފުނީގެ އިންވެސްޓްމެންޓްގެ ދާއިރާގެ އެންމެ ފުރަތަމަ މަންޒިލަކީ އިންޑިއާއެވެ.
2016ން ފެށިގެން އިންޑިއާގައި ޑިޖިޓަލް ޕޭމަންޓް ސިސްޓަމްތައް ވަނީ އާންމު ވެފައެވެ. އިންޑިއާގެގ ރިޒާވް ބެންކުގެ ރިކޯޑްތައް ދައްކާ ގޮތުން ދެ އަހަރުގެ ތެރޭ އިންޑިއާގައި ޑިޖިޓަލް ޕޭމަންޓްގެ ނިޒާމު ބޭނުން ކުރާ ނިސްބަތް ވަނީ 80 އިންސައްތައަށް އިތުރު ވެގެން ގޮސްފައެވެ.
