ޗައިނާއިން ދަނީ އަވަށްޓެރި ސަރަހައްދުގެ ކަނޑުތައް އަމިއްލަ ބާރުގެ ދަށަށް ގެނަސް އެތަންތާނގައި ޗައިނާގެ ގާނޫނު ހިންގުމަށް މަސައްކަތް ކުރަމުންނެވެ. ޗައިނާއިން ބޭނުން ވަނީ ޗައިނާއިން ކަނޑައަޅާ ކަނޑުގެ ސަރަހައްދަށް ބޯޓުތައް ވަނުމުގެ ކުރިން ޗައިނާއަށް އަންގައި ހުއްދަ ނެގުމަށާއި އަދި ބޯޓްތަކަށް ޗައިނާގެ ކެޕްޓަނުން އެރުވުމަށެވެ.
ސެޕްޓެމްބަރު 1 ގައި ޗައިނާއިން އަމަލު ކުރަން ފަށާފައިވާ ގާނޫނުގެ ސަބަބުން ދެކުނު އިރުމަތީ އޭޝިއާގެ ގައުމުތަކާ ޗައިނާ ޖެހި، އެމެރިކާއާއި ޗައިނާއާ ދެމެދު ކަނޑު ދަތުރުފަތުރާ ގުޅޭ އައު ދެބަސްވުމެއް ކުރިމަތިވުމަކީ ގާތް ކަމެކެވެ.
އޮގަސްޓް 27 ވަނަ ދުވަހު ޗައިނާގެ މެރިޓައިމް ސޭފްޓީ އެޑްމިނިސްޓްރޭޝަނުން ބުނެފައި ވަނީ، ސެބްމެރިންއާއި، ނިއުކްލިއަރ ހަކަތައިން ދުއްވާ އުޅަނދުތަކާއި، ރޭޑިއޯ އެކްޓިވް މާއްދާތައް އުފުލާ އުޅަނދުތަކާއި، ތެލާއި ކެމިކަލް އަދި ގޭހާއި ވިހަ މާއްދާތައް އުފުލާ ބޯޓްތައްވެސް މި ގާނޫނުގެ ތެރެއަށް ވަންނާނެ ކަމަށެވެ. މި ކެޓަގަރީގެ ސަބަބުން ގާތްގަނޑަކަށް ކަނޑުދަތުރުފަތުރު ކުރާ ހުރިހައި އުޅަނދެއްހެން މި ގާނޫނުގެ ދާއިރާގައި ޝާމިލު ކުރެވުނީއެވެ.
ޗައިނާއިން އުޅެނީ ދެކުނު ޗައިނާ ކަނޑާއި އިރުމަތީ ޗައިނާ ކަނޑުގެ މައްސަލާގައި އަވަށްޓެރިންނާއެކު ދެބަސްވުމެއްގައެވެ.
