އިންޑިއާގެ މިލިޓަރީ އެކަޑެމީތަކުގައި ތަމްރީން ވާން އައިސް ތިބި އަފްޣާނިސްތާން މީހުންގެ ތަމްރީން ޕްރޮގްރާމުތައް ފުރިހަމަ ކުރުމަށް ފުރުސަތު ފަހި ކުރުމަށް އިންޑިއާއިން ނިންމައިފިއެވެ. އިންޑިއާގެ އެކިއެކި މިލިޓަރީ އެކަޑެމީތަކުގައި އަފްޣާނިސްތާންގެ 130އަށް ވުރެން ގިނަ މީހުން ތަމްރީމް ވަމުން ދެއެވެ.
މިއީ އަފްޣާނިސްތާންގެ ކެޕާސިޓީ ބިލްޑިންގ ޕްރޮގްރާމުތަކުގެ ތެރޭން އިންޑިއާއިން ކުރަމުންދާ މަސައްކަތެކެވެ. މީގެ ތެރޭން މީހުން ތަމްރީން ވަމުން ދަނީ އިންޑިއަން މިލިޓަރީ އެކަޑެމީ (ދެހެރާދުން)އާއި އޮސްފިސަރޒް ޓްރެއިނިންގ އެކަޑމީ (ޗެންނާއި)އާއި ނޭޝަނަލް ޑިފެންސް އެކަޑމީ (ޕޫނޭ)ގައެވެ.
ތާލިބާނުން ކާބުލް ހިފައި ސަރުކާރު ވައްޓާލި ފަހުން މިމީހުންގެ މުސްތަގްބަލާ މެދު ސުއާލު އުފެދިފައި އޮތެވެ. ނަމަވެސް އިންޑިއާއިން ނިންމީ، މިމީހުންގެ ތަމްރީން ޕްރޮގްރާމު ފުރިހަމަ ކުރުމަށެވެ.
އިންޑިއާގެ ޗެންނާއިގައި، ގިނަ އަދަދަކަށް އަފްޣާން އަންހެން ސިފައިންގެ އޮފިސަރުންވެސް ތަމްރީން ވަމުން ދެއެވެ. މީގެ ތިން އަހަރު ކުރިން ވެފައިވާ އެއްބަސްވުމެއްގެ ދަށުން މި އޮފިސަރުން ހޮވާލާފައި ވަނީ އަފްޣާނިސްތާންގެ ތަފާތު ނަސްލުތަކަށް ބެހޭ ގޮތަށް އެއްގަމާއި ވައިގެ ސިފައިންނާއި ސްޕެޝަލް ފޯސަސްގެ ތެރޭން ސިފައިންގެ އޮފިސަރުން ހިމެނޭ ގޮތަށެވެ. އޮފިސަރުން ތަމްރީންވާ ދާއިރާތަކުގެ ތެރޭގައި، އިންޓެލިޖެންސާއި ސްޓްރެޓެޖިކް އެންޑް ޕަބްލިކް އެފެއާޒްއާއި ސިފައިންގެ މެޑިކަލް، އެޑިއުކޭޝަން، ގާނޫނު އަދި މާލީ ކަންކަމާ ބެހޭ ދާއިރާތައްވެސް ހިމެނެއެވެ.
އިންޑިއާއިން ވަނީ އަސްކަރީ ސާމާނުގެ އިތުރުން އަފްޣާނިސްތާންގެ އުމްރާނީ ތަރައްގީއަށް ދެ ބިލިއަން ޑޮލަރުގެ އެހީއެއްވެސް ވެދީފައެވެ.
