ޗައިނާއިން މިޔަންމާރގެ ސިފައިންނަށް ތާއީދު ކުރިނަމަވެސް އެގައުމުގެ މައި ސިޔާސީ ޕާޓީ އުވާލަން ގަޔާ ނުވާކަމަށް ޗައިނާއިން މިޔަންމާރގެ ސިފައިންނަށް އަންގައިފިއެވެ. ނޭޝަނަލް ލީގް ފޯރ ޑިމޮކްރެސީ (އެންއެލްޑީ) ގެ ވެރިކަން ވައްޓާލުމަށްފަހު ސިފައިންނަށް ޗައިނާއިން ވަނީ ތާއީދު ކޮށްފައެވެ. ސިފައިން މަސައްކަތް ކުރަމުން ދަނީ ނޭޝަނަލް ލީގް ފޯރ ޑިމޮކްރެސީ އުވާލާށެވެ.
މައި ސިޔާސީ ޕާޓީ އުވާލުމަށް ސިފައިން އައްޔަން ކޮށްފައިވާ އިލެކްޝަން ކޮމިޝަނުން ނިންމާފައި ވަނިކޮށް، ޗައިނާއިން އެންއެލްޑީ އުވާލުމަށް ނުރުހޭ މައްސަލާގައި ގިނަ ބަޔަކު ވަނީ ސުއާލު އުފައްދާފައެވެ.
މިޔަންމާރގެ އިރާވަޑީ ނޫހުން ރިޕޯޓްކޮށްފައިވާ ގޮތުގައި މިދިޔަ މަހު ޗައިނާއއި މިޔަންމާރގެ ސްޓޭޓް ކައުންސިލްއާ ދެމެދު ބާއްވާފައިވާ މަޖާޒީ ބައްދަލުވުމެއްގައި ޗައިނާއިން ވަނީ އެންއެލްޑީ އުވާލުމުގެ ފިޔަވަޅާ މެދު ސުއާލު އުފައްދާފައެވެ.
މީގެ އިތުރުން ޖުލައި މަހު، ޗައިނާގެ ކޮމިއުނިސްޓް ޕާޓީން ސަތޭކަ އަހަރު ފުރިހަމަ ކުރި މުނާސަބާ އިޙުތިފާލު ކުރަމުން ދިޔަ އިރު އެންއެލްޑީން ވަނީ ކޮމިއުނިސްޓް ޕާޓީއަށް ތަހުނިޔާ ކިޔާފައެވެ. އަދި ބަދަލުގައި ކޮމިއުނިސްޓް ޕާޓީން ވަނީ އެންއެލްޑީއަށް ޝުކުރު އަދާ ކޮށްފައެވެ.
ޗައިނާގެ ތަރުޖިބާކާރުން ދެކޭ ގޮތުގައި މިޔަންމާރގައި ޗައިނާއިން ހިންގާ ސްޓްރެޓެޖިކް ޕްރޮޖެކްޓްތައް ހިންގޭނީ، މިޔަންމާރގައި ހަމަޖެހުން ގާއިމް ކުރެވިގެންނެވެ.
ޗާއިނާ އިން އާންމުކޮށް ގެންގުޅޭ ސިޔާސަތަކީ ކޮންމެ ގައުމެއްގައި ޝަރުއީ ބާރުވެރި ފަރާތަކީ އެވަގުތަކު ވެރިކަމުގައި އޮންނަ ފަރާތެވެ. އެފަރާތެއް ވެރިކަމަށް އަންނަ ގޮތް ބަލާކަށް މުހިންމެއް ނޫނެވެ.
