ޕާކިސްތާން ސަރުކާރުން މީޑިއާ އިތުރަށް ކޮންޓްރޯލު ކުރުމަށް މަސައްކަތް ކުރަމުންދާ ކަމަށާއި އިމްރާން ޚާންގެ ތަޙްރީކޭ އިންސާފް ޕާޓީގެ ވެރިކަމުގައި، ޚިޔާލު ފާޅު ކުރުމުގެ ދާއިރާ ހަނިކޮށްފައިވާ ކަމަށް ޕާކިސްތާންގެ އިދިކޮޅު ފަރާތްތަކުން ތުހުމަތު ކޮށްފިއެވެ. ހިއުމަން ރައިޓްސް ވޮޗްއިން ވެސް ވަނީ ޕާކިސްތާންގެ މީޑިއާގެ ކަންކަން ބަލަހައްޓާ އިދާރާއަށް އިތުރު ބާރުތައް ދިނުމަށް ނިންމުމުން އެކަމާ މެދު ނުތަނަވަސްކަން ފާޅުކޮށްފައެވެ. އައު ގާނޫނުގެ ދަށުން ޕާކިސްތާންގައި ހުރިހައި ބާވަތެއްގެ މީޑިއާ ވަސީލަތްތައް އެއް އިދާރާއެއްގެ ދަށުން ކޮންޓްރޯލުކޮށް ބެލެހެއްޓޭނެއެވެ.
ޕާކިސްތާންގެ އިލެކްޓްރޯނިކް މީޑިއާ ރެގިއުލޭޓް ކުރާ ޕެމްރާ އަކީ ސަރުކާރުގެ އެންގުން ތަންފީޒު ކުރުމުގެ ގޮތުން ސަރުކާރާ ދެކޮޅު ޕްރޮގްރާމުތައް ގެނަސްދޭ ޗެނަލްތައް ބަންދުކޮށް އެފަރާތްތަކާ މެދު ފިޔަވަޅު އަޅާ އިދާރާއެވެ.
ޕާކިސްތާން ޑިމޮކްރެޓޮކް މޫވްމެންޓްގެ ރައީސް މައުލާނާ ފަޒުލުއްރަޙުމާން ވިދާޅުވީ ނޫސްވެރިން އެމީހުންގެ ހައްގުތައް ހޯދުމަށް ކުރަމުންދާ މަސައްކަތުގައި އިދިކޮޅު ޕާޓީތަކުން އެހީތެރިވެ ދޭނެ ކަމަށެވެ. ނޫސްވެރިންގެ ބައްދަލުވުމުގައި އޭނާ ވިދާޅުވީ ޕާކިސްތާންގައި ނުސްވެރިކަމުޖގެ މިނިވަންކަން ހަނިވެގެން ގޮސް، ޚުދު މުޚުތާރު ގޮތްތައް ވެރިވެފައިވާ ކަމަށެވެ. އަދި ޕާކިސްތާންގައި މިހާރު ދުސްތޫރީ ވެރިކަމެއް ނެތް ކަމަށާއި ޚިޔާލު ފާޅުކުރުމުގެ ދާއިރާ ހަނިކޮށް، ނޫސްވެރިންނަށް ނުރައްކާ ކުރެވެމުންދާ ކަމަށެވެ.
ހިއުމަން ރައިޓްސް ވޮޗްއިން ބުނިގޮތުގައި ޕާކިސްތާނުން އެކުލަވާލި ގާނޫނު އެކުލަވާލާފައި ވަނީ މަޝްވަރާއަކާ ނުލައި ސިއްރިއްޔާތުގައެވެ.
