ތާލިބާންގެ މެދުގައި ބައިބައިވުމެއް އުޅޭ ކަމަށް ހިންދުސްތާން ޓައިމްސްއިން ބުނެއެވެ. ވެރިކަން ކޮންޓްރޯލް ކުރުމާ ބެހޭ ގޮތުން ތާލިބާނުންގެ މެދުގައި ދެބަސްވުން އުފެދިފައި ވަނީ ކަންދަހާރްގައި ހުންނަ މުއްލާ ޔައުޤޫބްއާއި ހައްގާނީ އަޚުންގެ މެދުގައެވެ.
ޙައްޤާނީ އަޚުންނަކީ، ތާލިބާން އުފެއްދުމުގައި ބައިވެރިވި، ސީއައިއޭއާއެކު ގާތް ކަމެއް ބޭއްވި މުޖާހިދީންގެ ތެރޭގައި ހިމެނުނު ސިރާޖުއްދީން ހައްގާނީގެ ކުދިންނެވެ. މިމީހުންނަކީ ތާލިބާންގެ އަސްކަރީ ގޮފި ކޮންޓްރޯލް ކުރާ ހައްގާނީ ނެޓްވަރކުގެ ލީޑަރުންނެވެ.
ތާލިބާންގެ ކަންދަހާރް ފެކްޝަންއާއި ހައްގާނީ ފެކްޝަންގެ ދެމެދު މުހިންމު މަޝްވަރާތައް ބާއްވާފައި ވެއެވެ. ސަރުކާރު އެކުލަވާލުމުގެ މަސައްކަތްވެސް ދެ ބަސްވުންތަކާ ހެދި ލަސްވި ކަމަށް ވެއެވެ. އަދި ޕާކިސްތާންގެ ޖާސޫސީ އިދާރާގެ ވެރިޔާ، ކާބުލްއަށް ވަޑައިގަތީ މި ފަރާތްތަކުގެ ދެބަސްވުން ހައްލުކޮށް ސުލްޙަ ކުރުމަށް ކަމަށްވެސް ބުނެއެވެ.
ހައްގާނީ ނެޓްވަރކަކީ ޕާކިސްތާނުން ސަޕޯޓް ކުރާ ގްރޫޕެކެވެ.
މުއްލާ ޔައުގޫބަކީ، ތާލިބާންގެ ލީޑަރު އަދި ބާނީ މުއްލާ އުމަރުގެ ދަރިފުޅެވެ.
ތާލިބާންގެ ދެބަސްވުމުގެ ތެރޭގައި މުއްލާ ޔައުގޫބު ބޭނުން ވަނީ ސަރުކާރެއް އެކުލަވާލާއިރު، ހަނގުރާމަވެރިންނަށް އިސްކަން ދިނުމަށެވެ. މިއާ ޚިލާފަށް މުއްލާ އަބްދުލް ޣަނީ ބިރާދަރު ބޭނުން ވަނީ ސިޔާސީ މީހުންވެސް ހިމައިގެން ބައިނަލްއަގްވާމީ މުޖުތަމައު ބަލައިގަންނަ ފަދަ ސަރުކާރެއް އެކުލަވާލަށެވެ.
މުއްލާ ޔައުގޫބު ބުނިކަމަށް ރިޕޯޓްތައް ބުނަނީ، "ދޯޙާގައި ފިނި ކޮޓަރީގައި ތިބޭ މީހުންނަކަށް ސަރުކާރު އެކުލަވާލަން ވީގޮތެއް ކިޔައި ނުދެވޭނެ ކަމަށެވެ."
މުއްލާ ބިރާދަރުއާއި ޝޭރު މުޙައްމަދު ސްޓްނިކްޒާއީ އަކީ، ދޯހާގައި އެމެރިކާއާ އެކު ސުލްހައިގެ ވާހަކަތައް ބޭއްވި ފަރާތްތަކެވެ.
މީގެ އިތުރުން ޕުސްޓޫ ދަރިކޮޅުގެ މީހުންނާއި ޕުޝްތޫ ނޫން މީހުންގެ މެދުގައިވެސް ދެބަސްވުންތައް އުޅެއެވެ. ކޮންމެ ބަޔަކުވެސް ބޭނުންވަނީ ސަރކާރު އެކުލަވާލުމުގައި އެބަޔެއްގެ ހިއްސާ ބޮޑުކޮށް އޮތުމަށެވެ.
މި ދެބަސްވުންތަކުގެ ބިރަކީ އެމެރިކާއިން ދޫކޮށް ގޮސްފައިވާ 85 ބިލިއަން ޑޮލަރުގެ ހަތިޔާރު އެކި ފެކްޝަންތަކާއި ޖަމާއަތްތަކުގެ ކޮންޓްރޯލްގެ ދަށަށް އައުމުން ދެން ވާނެ ގޮތަކާ މެދުގައެވެ.
އެމެރިކާގެ ޖޮއިންޓް ޗީފްސް އޮފް ސްޓާފް އިއްޔެ ސެނެޓްގައި ވިދާޅުވެފައި ވަނީ އަފްޣާނިސްތާންގައި އަހުލީ ހަނގުރާމައެއް އުފެދިދާނެ ކަމީ ވަރަށް ޔަގީން ކަމެކެވެ.
ހައްގާނީ ނެޓްވަރކުން ބޭނުން ވަނީ ދިފާއީ ވުޒާރާ އެމީހުންނަށް ލިބުމަށެވެ. ނަމަވެސް މުއްލާ ޔައުގޫބުގެ ފެކްޝަނުން އެ ވުޒާރާ ހައްގާނީ އަޚުންނަށް ދޫކޮށްލާކަށް ބޭނުމެއް ނޫނެވެ.
އަފްޣާން ބައެއް ރިޕޯޓްތައް ބުނާ ގޮތުން ދެ ފަރާތް ދެމެދު ބަޑިން ހަމަލަ ބަދަލު ކުރެވިފައި ވެއެވެ. އަދި މުއްލާ ބިރާދަރު ޒަޚަމްވި ކަމަށްވެސް ވެއެވެ. ނަމަވެސް މި ވާހަކަ ރަސްމީކޮށް ޔަގީން ކުރެވިފައެއް ނުވެއެވެ.
މުއްލާ ބިރާދަރަކީ، ތާލިބާންގެ ބާނީ މުއްލާ އުމަރުގެ ޅިޔަނެވެ. އަދި އޭނާގެ އެންމެ ގާތް އިތުރުބާރު ކުރެވޭ ފަރާތެވެ.
