ތާލިބާނުން ކާބުލް ހިފި މައްސަލާގައި ސީރިއަސް ވާހަކައެއް ނުދައްކައި އޮތުމަށްފަހު، ޕަންޖްޝޭރް ސަހަރަށް ތާލިބާނުން ވެރިވެގަތުމުން އީރާނުން ބަސް ބުނެފިއެވެ. އީރާގެ ޚާރިޖީ ވުޒާރާގެ ތަރުޖަމާން ސައީދު ޚަތީބްޒާދާ ވިދާޅުވީ، ބޭރުގެ ފަރާތްތަކުން އަފްޣާނިސްތާންގެ ދާޚިލީ ކަންކަމުގެ ތެރެއަށް ވަދެގަންނަނީ ކަމަށެވެ. އަދި ޕަންޖްޝޭގް ގައި މަރުވި މީހުންނަކީ ޝަހީދު ވެގެން ދިޔަ ބައެއްކަމަށްވެސް ޚަތީބްޒާދާ ސިފަ ކުރެއްވިއެވެ.
އީރާންގެ މީސްމީޑިއާއާއި އަފްޣާނިސްތާނގެ މީސްމީޑިއާއިން ވަނީ ތާލިބާނުންނަށް އެހީތެރިވުމަށް ޕާކިސްތާނުން ވައިގެ ދިފާއީ އެހީތެރިކަން ފޯރުކޮށްދީފައިވާ ކަމަށް ބުނާ ވީޑިއޯތައްވެސް ދައުރުކޮށްފައެވެ.
ތާލިބާނުން ޕަންޖްޝޭރަށް ދިން ހަމަލަތަކުގައި އަޙުމަދު މަސްއޫދުގެ ހަނގުރާމަވެރިންގެ ތަރުޖަމާން ނޫސްވެރިޔާ، ފަހީމް ދަސްތީވެސް ވަނީ ޝަހީދުވެފައެވެ. މިކަންވެސް އީރާނުން ވަނީ ކުށްވެރިކޮށްފައެވެ.
އީރާނުގެ ޚާރިޖީ ވުޒާރާއިން ތާލިބާނުންނާއި ޕާކިސްތާން ސިފައިން ޕަންޖްޝޭރްގައި ހިންގާފައިވބާ ހަނގުރާމަ ކުށްވެރިކުރުމުން އަފްޣާން ތާލިބާނުންގެ މީޑިއާއިން ބުނެފައި ވަނީ އީރާނުން އިންޑިއާއާ އެއްފަޅިއަކަށް އަރައި ޕާކިސްތާނާ ދެކޮޅުވީ ކަމަށެވެ.
ޚަތީބްޒާދާ ވިދާޅުވީ ސީދާ ގޮތުންނާއި ނުސީދާގޮތުން އަފްޣާނިސްތާންގެ މަސްރަހުގައި ބޭރުގެ ގައުމުތަކުން ބެހުމުގެ ސަބަބުން ބޭރުގެ ގައުމުތަކަށް ލިބިފައި ވަނީ ކޮޅުކެއްސެވެ. އަދި ޕަންޖްޝޭރްގެ މައްސަލަވެސް އަފްޣާންގެ ދޮށީ އުމުގެ ހަރު މީހުންގެ މަޖިލިސްތައް މެދުވެރިކޮށް ހައްލުކުރުމަށް އޭނާ ގޮވާލެއްވިއެވެ.
