އިންޑިއާއިން ބޭނުންވަނީ އިންޑިއާގެ ސިނާއީ އުފެއްދުމުގެ ދާއިރާއަކީ ގައުމީ އުފެއްދުންތެރިކަމުގެ 25 އިންސައްތަ ހިއްސާ ކުރާ ދާއިރާއަށް ވާށެވެ. ނަމަވެސް 2014ގައި ފަށާފައިވާ މި ކެމްޕެއިން އަދިވެސް ވައިގައި ހިފާފައެއް ނުވެއެވެ. އިންޑިއާގެ ގައުމީ އުފެއްދުމަށް ސިނާއީ ދާއިރާ ޙިއްސާ ކުރަނީ 17 އިންސައްތައިގައެވެ.
ސަރުކާރުން ވަނީ އިންޑިއާގައި ސިނާއަތްތައް ތަރައްގީ ކުރަން ބޭނުންވާ ބޭރުގެ ފަރާތްތަކަށް ހިތްވަރު ދިނުމުގެ ގޮތުން ޓެކްސް މައާފް ކޮށްދިނުމާއެކު އެތައް ފައިދާއެއް ލިބޭ ގޮތަށް ގަވާއިދުތަކަށް ބަދަލުތައް ގެނަސްފައެވެ.
ބޭރުގެ ކުންފުނިތަކުން އިންޑިއާގައި އުފެއްދުންތެރިކަމަށް މަސައްކަތްކޮށްފިނަމަ، 27 ބިލިއަން ޑޮލަރުގެ ފައިދާ އެފަރާތްތަކަށް މިހާރު ލިބޭނެ ކަމަށް ބެލެވެއެވެ. މިހާތަނަށް އިންޑިއާގައި އުފެއްދުމަށް ކުންފުނިތަކަށް ހިތްވަރު ލިބިގެން ގޮސްފައި ނުވަނީ ގަވާއިދުތަކުގެ ހަރުކަށި ކަމާއި އެކިއެކި ހުއްދަތައް ހޯދުމުގައި ދަތިތައް ދިމާވެގެންނެވެ.
މިހާރު ގަވާއިދުތަކަށް ބަދަލު ގެނަސްފައިވާ ގޮތުން ފަސް އަހަރު ދުވަހުގެ މުއްދަތަށް ކުންފުނިތަކުގެ އުފެއްދުންތަކާއި އާމްދަނީއަށް ރިއާޔަތް ކޮށް އެފަރާތްތަކަށް މާލީ އިނާޔަތްތައް ދިނުން ހިމެނެއެވެ.
އިންޑިއާގައި އަމިއްލަ ސިނާއަތަށް ހިތްވަރު ދިނުމުން ޗައިނާއިން ދިމާވާ ދަތިތައް ޙައްލު ކުރެވޭނެއެވެ. އިންޑިއާގެ އައިޓީ ދާއިރާގެ ހާޑްވެއަރއާއި ސޯލާ ޕެނަލްތަކާއި މުވާސަލާތީ ވިއުގައިގައި ބޭނުންކުރާ ސާމާނުތަކުގެ 80 އިންސައްތައަކީ، ޗައިނާއިން އަންނަ ތަކެއްޗެވެ. އަދި ބޭސް އުފެއްދުމުގެ ދާއިރާގައި ބޭނުންކުރާ މާއްދާތަކުގެ 40 އިން ސައްތަ އަންނަނީ ޗައިނާއިންނެވެ. އަދި ދަނގަނޑާއި އެލުނިމިއަންގެ ބާވަތްތަކުގެ ބޮޑު ބައެއްވެސް ޗައިނާއިން އާދެއެވެ.
ޗައިނާއަކީ ދުނިޔެއަށް ބޭނުންވާ ސާމާނުގެ 15 އިންސައްތަ ސަޕްލައި ކުރާ ގައުމެވެ. އިންޑިއާއިން ސަޕްލައި ކުރަނީ އެންމެ ދޭއް އިންސައްތައިގެ މުދަލެވެ.
