އިންޑިއާއާއި އޮސްޓްރޭލިއާގެ ދިފާއީ ވަޒީރުންނާއި ޚާރިޖީ ވަޒީރުން ބައްދަލު ކުރައްވާ ގޮތަށް ހަމަޖައްސަވައިފިއެވެ. މި ދެ ގައުމުގެ ދެ ވުޒާރާގެ ވަޒީރުން ބާއްވާ މިފަދަ ފުރަތަމަ ބައްދަލުވުމެވެ.
އިންޑިއާއާއި އެމެރިކާއިން ޚާރިޖީ ވަޒީރުންނާއި ދިފާއީ ވަޒީރުންގެ 2+2 ގެ ބައްދަލުވުން ބާއްވައެވެ.
ހުކުރު ދުވަހު އިންޑިއާއަށް އޮސްޓްރޭލިއާގެ ދިފާއި ވަޒިރު ވަޑައިގެން ފުރަތަމަ ބައްދަލުވުން ބޭއްވެވުމަށްފަހު އޮސްޓްރޭލިއާގެ ޚާރިޖީ ވަޒީރުވެސް ވަޑައިގެން އިންޑިއާގެ ޚާރިޖީ ވަޒީރާއި ދިފާއީ ވަޒީރާއެކު ބައްދަލު ކުރައްވާނެއެވެ.
2020ގެ ޖޫން އިން ފެށިގެން އޮސްޓްރޭލިއާއާއި އިންޑިއާގެ ގުޅުމުގެ ފެންވަރު ވަނީ މަތިކޮށްފައެވެ. ދެ ގައުމުން ކުއޯޑްގައި އެމެރިކާއާއި ޖަޕާނާއެކުވެސް ޙަރަކާތްތެރި ވެއެވެ.
ޗައިނާއިން ދެކުނު ޗައިނާ ކަނޑުގައި ގެންގުޅޭ ގަނާ ކުރުމުގެ ހަމަތަކާ ދެކޮޅަށް އިންޑިއާއާއި އޮސްޓްރޭލިއާ ގުޅިގެން މަސައްކަތް ކުރެއެވެ. އަދި ދެ ގައުމުން އަސްކަރީ ތަމްރީންތައްވެސް ބާއްވައެވެ.
އެމރިކާގެ ގުއާމްގައި އިންޑިއާއާއި އެމެރިކާއިން ބޭއްވި މަލަބާރު އެކްސަސައިޒްގައިވެސް އޮސްޓްރޭލިއާއިން ބައިވެރިވެއެވެ.
މި ހަފްތާގައި އިންޑިއާއާއި އޮސްޓްރޭލިއާއިން ވަނީ އޮސިންޑެކްސް ގެ ނަމުގައި ދެ ގައުމުގެ އަސްކަރީ ތަމްރީންގެ ހަތަރު ވަނަ ބުރެއް އޮސްޓްރޭލިއާގެ ޑަރވިން ކައިރީގައި ބާއްވާފައެވެ. މި ތަމްރީންތަކުން ދެފަރާތުން ހިންގާ އަސްކަރީ އޮޕަރޭޝަންތައް އެއްގޮތް ކުރުމަށް މަގުފަހި ވެގެންދާނެކަމަށް އިންޑިއާއިން ބުނެއެވެ.
