ތާލިބާނުން އަފްޣާނިސްތާންގައި ބައިމަދު މީހުންނަށް ހައްގުތައް ދޭންވާނެ ކަމަށް ބުނެ ޝީއާ މަޛުހަބުގެ ދަންނަބޭކަލުން އިއްޔެ ތާލިބާނަށް އިލްތިމާސްކޮށްފިއެވެ. ތާލިބާނުން އެކުލަވާލާފައިވާ ސަރުކާރުގައި ބައިމަދު މީހުން އެދެވޭ ގޮތަކަށް ތަމްސީކޮށްފައި ނުވުމުން ގިނަ ބަޔަކު ވަނީ ކަން ބޮޑުވުން ފާޅުކޮށްފައެވެ.
ޝިޢާ މަޛުހަބުގެ ދަންނަ ބޭކަލުން އިއްޔެ އެދިވަޑައިގަތީ އަފްޣާނިސްތާންގައި އިސްލާމީ ޝަރީއާ ތަންފީޒު ކުރާއިރު އިސްލާމް ދީނުގެ ފަސްވަނަ މަޛުހަބުގެ ފިޤުހުވެސް ބަލައި ގަތުމަށެވެ.
އާޔަތުﷲ ސަލާޙީ މުދައްރިސް ވިދާޅުވީ އިމާމް ޖަޢުފަރުއްޞާދިޤަށް ނިސްބަސް ކުރެވޭ ޖަޢުފަރީ ފިޤުހުގެ މަޒުހަބު ތާލިބާނުން ބަލައިގަނެ، ޝީއާއިންނަށް އެމީޙުންގެ ހައްގު ގަދަރާއި މަގާމު ދޭން ވާނެ ކަމަށެވެ.
މި ބައްދަލުވުމުގައި ބައިވެރިވެ ވަޑައިގަތް އަންހެނުންގެ ހައްގަށް ވަކާލާތު ކުރައްވާ މަރުޒިއްޔާ ކާޒިމީވެސް އެދިވަޑައިގަތީ ތާލިބާނުން އަންހެނުނަށް ހައްގުތައް ދިނުމަށެވެ.
