ތަލިބާންގެ ސަރުކާރެއް އެކުލަވާލިއިރު، ދޯހާގައި އެމެރިކާއާއެކު ސުލްހައިގެ ވާހަކަތަކުގައި ހަރަކާތްތެރިވި ޓީމަށް މަތީ މަގާމެއް ދީފައި ނުވުމުން ތާލިބާނުންގެ އަސްލު ކުލަ ފެނިއްޖެއެވެ. ތާލިބާންގެ ރޫހާނީ ލީޑަރު މުއްލާ އުމަރުގެ ދަރިފުޅު، މުއްލާ ޔައުގޫބު ބުނެފައި ވަނީ ދޯހާގެ ފިނި ކޮޓަރީގައި ތިބޭ މީހުން ތާލިބާނަށް ގޮތް ކިޔައި ދީގެން ނުވާނެ ކަމަށެވެ.
ތާލިބާންގެ ސަރުކާރެއް އެކުލަވާ ލެވުނީ އެމީހުންގެ އެތެރޭގެ ދެބަސްވުންތައް ހައްލު ކުރުމަށް ޕާކިސްތާންގެ ޖާސޫސީ އިދާރާގެ ވެރިޔާ ފާއިޒް ހަމީދު ކާބުލްގައި މަސައްކަތް ކުރެއްވުމުންނެވެ.
ދޯޙާ ގައި މަޗްވަރާގައި އުޅުނު ޓީމުގެ ބައެއް މީހުންނަށް މަގާމެއް ލިބިފައެއް ނުވެއެވެ. އަދި މަގާމު ލިބުނު މީހުންނަށްވެސް ލިބިފައި ވަނީ ޑެޕިއުޓީންގެ ފެންވަރުގެ މަގާމު ތަކެކެވެ.
ދޯޙާގެ މަޝްވަރާގައި އެމެރިކާއާއެކު މަޝްވަރާ ކުރި، މުއްލާ އަބްދުލް ޣަނީ ބިރާދަރަށްވެސް ލިބިފައި ވަނީ ބޮޑު ވަޒީރުގެ ނާއިބެއްގެ މަގާމެވެ. އަދި އޭނާއާއެކު މަޝްވަރާތަކުގައި އުޅުނު ޝޭރު މުޙައްމަދު ސްޓެނިކްޒާއީއަށް ލިބިފައި ވަނީ ފޮރިން މިނިސްޓަރުގެ ނާއިބް ކަމެވެ.
ދޯޙާ ޓީމް ބެލެވިފައި ވަނީ ތާލިބާނުންގެ ތެރޭންވެސް ބުއްދި ހަމަޖެހޭ ލޯހުޅުވިފައިވާ ބަޔެއްގެ ގޮތުގައެވެ.
ޕާކިސްތާންގެ މުހައްލިލުން ބުނާ ގޮތުގައި އަފްޣާންގެ ވެރިކަމަށް ގެނަސްފައިވާ މުއްލާ މުޙައްމަދު ހަސަން އަޚުންދު އަކީ ތާލިބާންގެ އެއްވެސް ފެކްޝަނަކާ ގުޅުން ހުރި މީހެއް ނޫނެވެ. ތާލިބާންގެ ސަރުކާރުގައި ދާޚިލީ ސަލާމަތީ ކަންކަމާއި ޖާސޫސީ ކަންކަން ބަލަހައްޓާނީ ޓެރަރިސްޓް ޖަމާއަތް ކަމުގައިވާ ހައްގާނީ ނެޓްވަރކުގެ މެމްބަރުންނެވެ. އަދި އަސްކަރީ ކަންކަމުގައި އިސްވެ ހުންނާނީ މުއްލާ އުމަރުގެ ދަރި، މުއްލާ ޔައުގޫބުއެވެ.
މުއްލާ އަޚުންދަކީ، ތާލިބާންގެ މަޝްވަރާ މަޖިލީހުގެ ރައީސެވެ. އޭނާ އަކީ ހަނގުރާމައިގައި އުޅުނު މީހެއް ނޫނެވެ. 20 އަހަރު ވަންދެން އޭނާ އުޅެފައި ވަނީ ތާލިބާނުންގެ ދީނީ ކަންކަމުގައި ޕާކިސްތާންގެ ކުއެޓާ ގައެވެ.
