ޕާކިސްތާންގެ ތާލިބާން ޖަމާއަތަކީ ޓެރަރިސްޓް ޖަމާއަތެއް ކަމުގައި ސިފަކުރާ މީޑިއާއަށް ޕާކިސްތާން ތާލިބާން ޖަމާއަތުން އިންޒާރު ދީފިއެވެ. ތަހްރީކޭ ތާލިބާޏް ޖަމާއަތުން ބުނެފައި ވަނީ އެ ޖަމާއަތަކީ ޓެރަރިސްޓް ޖަމާއަތެއް ކަމަށް ސިފަ ކުރާ މީޑިއާ އިދާރާތަކަކީ، އެ ޖަަމާއަތުގެ ދުޝްމަނުންނެވެ. އަދި އެފަދަ ފަރާތްތަކާ ދެކޮޅަށް ފިޔަވަޅު އަޅާނެ ކަމަށެވެ.
ނޫސް މީޑިއާގައި ތަޙްރީކޭ ތާލިބާނާ މެދު ބުނާ ވާހަކަތައް މޮނީޓާ ކުރަމުންދާ ކަމަށް ބުނެ ބިރު ދައްކަމުން ތާލިބާނުން ބުނެފައި ވަނީ އެމީހުންނަށް ޚަބަރު ލިޔާ އިރު އިޝާރާތް ކުރަން ޖެހޭނީ އެ ޖަމާއަތުގެ ނަމުން ކަމަށެވެ.
ތަޙްރީކޭ ތާލިބާން ޖަމާއަތަކީ ޓެރަރިސްޓް ޖަމާއަތެއް ކަމަށް ޕާކިސްތާނު ސަރުކާރުން ވަނީ ނިންމާފައެވެ. އަދި މީޑިއާއަށްވެސް އަންގާފައި ވަނީ ތަހްރީކޭ ތާލިބާން ފަދަ ޖަމާއަތްތަކަކީ ގަދަރުވެރި ބަޔެއްގެ ގޮތުގައި ސިފަކޮށް ނުދެއްކުމަށެވެ. ޕާކިސްތާނުން ތަހްރީކޭ ތާލިބާން ޖަމާއަތް މަނާ ޖަމާއަތެއްކަމަށް ކަނޑައެޅީ 2008 ގައެވެ. މި ޖަމާއަތުގެ ވެރިޔާ ބައިތުﷲ މަހްސޫދު، އެމެރިކާގެ ޑްރޯން ހަމަލާއެއްގައި މަރާލާފައި ވަނީ 2009 ގައެވެ.
ޕާކިސްތާންގެ ނޫސްވެރިންގެ ޖަމުއިއްޔާއިން ވަނީ ތަހްރީކޭ ތާލިބާންގެ އިންޒާރާ މެދު ނުތަނަވަސްކަން ފާޅުކޮށްފައެވެ.
