ބޮޑު ބާރެއްގެ ގޮތުގައި އޮތުމަށްޓަކައި ޗައިނާއަށް އެމެރިކާ ފަހަނައަޅައި ކުރިއަރައިގެން ދާން ޖެހެއެވެ. މި މަގާމު ހާސިލުކުރުމަށްޓަކައި، ޗައިނާ ގަދަ އިގްތިސާދީ ބާރަކަށް ވާން ޖެހެއެވެ. ޓެކްނޮލޮޖީގެ ދާއިރާގައި ލީޑަރަކަށް ވާން ޖެހެއެވެ. ޗައިނާގެ ސިޔާސީ ނިޒާމަށާއި ސިޔާސަތު ކަނޑައެޅުމުގެ އުސޫލުތަކަކީ ދުނިޔެ ބަލައިގަންނަ އުސޫލުތަކެއް ކަމުގައި ވާން ޖެހެއެވެ. މި ހުރިހައި މަގްސަދުތަކެއް ޗައިނާއަށް ހާސިލު ކުރެވޭނީ، ޗައިނާގެ ޖާސޫސީ މަޢުލޫމާތު އެއްކުރުމުގެ ނިޒާމު ކުރިއަރައިގެންނެވެ.
އެމެރިކާއަށް ޗައިނާއިން ޖާސޫސް ކުރުމުގެ ސަބަބުން އެމެރިކާއަށް އަހަރަކު ފިކުރީ މުދަލުގެ ހައްގުތަކުން 200އާއި 600 ބިލިއަން ޑޮލަރުގެ ގެއްލުމަކާ ކުރިމަތިލާން ޖެހެއެވެ. މިކަން މިގޮތަށް ހިނގަމުންދާތާ ވިއްސަކަށް އަހަރު ވެއްޖެއެވެ. މި މުއްދަތުގައި ޖުމުލަ ގޮތެއްގައި 12 ޓްރީލިއަން ޑޮލަރަށް ވުރެން ގިނައިން އެމެރިކާއަށް ގެއްލުމާ ކުރިމަތިލާން ޖެހިފައިވާނެ ކަމަށް މީޑިއާ ރިޕޯޓްތައް ލަފާ ކުރެއެވެ.
އެމެރިކާއަށް ވާދަވެރިންގެ ސަބަބުން ގެއްލުމާ ކުރިމަތިލާން ޖެހެއެވެ. އޭގެ ތެރޭގައި، ރަޝިޔާއާއި އުތުރު ކޮރެއާއާއި އީރާނާއި އަދި އެމެރިކާއަށް ނުރައްކާ ކުރާ ޓެރަރިސްޓް ޖަމާއަތްތަކުން އަންނަ ނުރައްކާތައް ހިމެނެއެވެ. އެހެންނަމަވެސް އެމެރިކާ ދެމި އޮތުމުގައި އެންމެ ބޮޑު ގޮން ޖެހުމަކާ ކުރިމަތިލާން ޖެހިފައި ވަނީ މިފަހަކަށް އައިސް ޗައިނާ އިންނެވެ. އެމެރިކާގެ މަސްއޫލުވެރިން ލަފާ ކުރާ ގޮތުގައި ޗައިނާއަކީ އެމެރިކާގެ ގައުމީ ސަލާމަތަށް އޮތް ނުރައްކަލެކެވެ.
2021ގެ ކުރީކޮޅު، ކޮންގްރެސްގައި ވާހަކަ ދައްކަވަމުން އެމެރިކާގެ ޑައިރެކްތަރ އޮފް ނޭޝަނަލް އިންޓެލިޖެންސް އެވްރީލް ހެއިންސް ވިދާޅުވެފައި ވަނީ އެމެރިކާގެ ޖާސޫސީ ދާއިރާގެ އެންމެ ބޮޑު ބޮލު ރިހުމަކީ ޗައިނާއާ ކުރިމަތި ލުމެވެ. ޗައިނާ އަކީ އެތައް ދާއިރާއަކުން އެމެރިކާގެ ވާދަވެރި ގައުމެއް ކަމުގައި އޭނާ ސިފަ ކުރެއްވިއެވެ. އަދި ޗައިނާގެ ކޮމިއުނިސްޓް ނިޒާމަށް ފަހިވާ ގޮތަށް ޗައިނާއިން ކަންކަން ބަދަލު ކުރުމަށް ކުރާ މަސައްކަތާ އެމެރިކާއިން ކުރިމަތިލާކަމުގައި އޭނާ ވިދާޅުވިއެވެ.
އެފްބީއައިގެ ޑިރެކްޓަރ ވިދާޅުވާ ގޮތުގައި ކޮންމެ ދިހަ ގަޑި އިރަކުން އެމެރިކާގައި ޗައިނާއާ ދެކޮޅަށް ޖާސުސީ ތަހްގީގެއް ފަށައެވެ. މިހާރުވެސް އެފްބީއައިން ބަލަމުންދާ ދެ ހާހަށް ވުރެން ޗައިނާގެ ޖާސޫސީ ހަރަކާތާ ގުޅުން ހުރި މައްސަލަތައް ހިނގަމުން ދެއެވެ. ގިނަ މައްސަލަތަކަކީ އިގްތިސާދީ ދާއިރާއަށް ޖާސުސް ކުރުމާ ގުޅުން ހުރި މައްސަލަތަކެވެ. މިދިޔަ މަދު އަހަރުތަކުގެ ތެރޭގައި ޗައިނާއިން ޖާސޫސް ކުރުމުގެ ހަރަކާތްތައް 1300 ޕަސެންޓަށް އިތުރު ކޮށްފައިވާ ކަމަށް އޭނާ ވިދާޅުވެއެވެ.
ޗައިނާގެ ޖާސޫސް ކުރުމުގެ ހަރަކާތްތައް ވިލަރެސް ކުރަނީ މިނިސްޓްރީ އޮފް ސްޓޭޓް ސެކިއުރިޓީންނެވެ. ބައެއް ފަހަރަށް ސިފައިންވެސް މީގައި ދައުރު އަދާކޮށް ހަދައެވެ.
ޗައިނާގެ ޖާސޫސީ ހަރަކާތަކީ، އެތައް ފަށަލައެއް ލެވިގެންވާ އަދި އެތައް އާލާތަކާއި އެތައް އުކުޅެއް ބޭނުން ކޮށްގެން ހިންގޭ ފުޅާ ދާއިރާއެއްގެ ހަރަކާތެކެވެ. މީގައި ޗައިނާ ސަރުކާރު ހިއްސާވާ ކުންފުނިތަކާއި އެކުންފުނިތަކުގެ މުވައްޒަފުންނާއި އަމިއްލަ ކުންފުނިތަކާއި ޗައިނާގެ ދިރާސާ ކުރާ މަރުކަޒުތަކުގެ ފަރާތްތަކާއި ކިޔަވާ ކުދިންނާއި ދިރާސާ ކުރާ ފަރާތްތައް ހިމެނެއެވެ. މައުލޫމާތުގެ ރަސް މަގުގައި އަތް ފުނާ އަޅައިގެންނާއި މައުލޫމާތުގެ ވިއުގަތަކަށް ތޮރުފިގެންނާއި ފޭދިގެން މަޢްލޫމާތުން ވައްކަން ކުރުމަކީވެސް އާންމު އުކުޅެކެވެ.
އެމެރިކާއިންވެސް ސައިބާ ކޮމާންޑެއް އެކުލަވާލާފައި ވެއެވެ. އެމެރިކާގެ ސައިބާ ކޮމާންޑްގައި ތިބޭނީ ހަ ހާހެއްހައި މީހުންނެވެ. ޗައިނާއިން މަޢުލޫމާތުގެ ރަސްމަގުގެ ހަނގުރާމައަށް ސާޅީސް ހާސް މީހުން ނެރެފައި ތިބެއެވެ.
ޗައިނާގެ ޓެކްނޮލޮލޮޖީއާއި އިލްމާއި ހުނަރުގައި ކޖރު މުއްދަތެއްގެ ތެރޭގައިކ ކުރިއަރައިގެން ދިއުމުގެ ނަތީޖާއަކީ މިއީއެވެ.
