ދުނިޔޭގެ ގައުމުތަކަށް ދޭން ބައިނަލްއަގްވާމީ ވެކްސިން ފޯރުކޮށްދޭ ނިޒާމާ ވެކްސިން ހަވާލު ނުކުރާނެ ކަމަށް އިންޑިއާއިން ބުނެފިއެވެ. އިންޑިއާއިން ބުނިގޮތުގައި އެންމެ ފުރަތަމަ އަމާޒަކީ ގައުމުގެ އާބާދީގެ ފުރާވަރުގެ އެންމެނަށް ވެކްސިން ފޯރިވައި ދިނުމެވެ.
ކޮވިޑްގެ ރާޅުތައް ލައިގަތުމުގެ ކުރިން އިންޑިއާއިން ވަނީ ހުރަހަކާ ނުލައި ބޭހާއި ވެކްސިން ގައުމުތަކަށް ފޯރިވައިދީފައެވެ. މިހާރު އިންޑިއާއިން އަމާޒު ހިފާފައިވަނީ މި އަހަރު ނިމޭއިރަށް އެންމެނަށް ވެކްސިން ޖަހަނިންމުމަށެވެ. އެގޮތުން ދުވާލެއްގެ މައްޗަށް އަށް މިލިއަނާއި ދިހަ މިލިއަން ޑޯޒް ދެމުން އެބަ ގެންދެއެވެ.
އިންޑިއާއިން އެތައް ބްރޭންޑެއްގެ ވެކްސިނެއް އުފައްދައެވެ. ކޮވިޝީލްޑާއި ކޯވެކްސިންއަކީ އިންޑިއާގެ އަމިއްލަ ދެ ވެކްސިނެވެ. މިހާރު ރަޝިޔާގެ ސުޕްޓްނިކްވެސް އުފައްދައި ބޭނުން ކުރަން ފަށާފައި ވެއެވެ.
އިންޑިއާގައި ވެކްސިން އުފެއްދުމުގެ ކެޕާސިޓީއަކީ މިމަސް ފެށުނު އިރު މަހެއްގެ މައްޗަށް 130 މިލިއަން ޑޯޒް އެވެ.
އިންޑިއާގެ ކޮވިޑްގެ ހާލަތު ގޯސްވެގެން ދިޔައީ ވެކްސިން އުފެއްދުމަށް ބޭނުންވާ ރޯ މާއްދާތައް އެމެރިކާއިން އިންޑިއާއަށް ފޮނުވުން މަނާ ކުރުމުގެ ސަބަބުންނެވެ.
އިންޑިއާގައި ވެކްސިން ޖަހަން ޖެހޭ އުމުރު ފުރައިގެ 950 މިލިއަން މީހުން އެބަ ތިއްބެވެ. މި އަދަދުގެ ތެރޭން ދެ ޑޯޒް ލިބިގެންފައިވަނީ އަދި 11 އިންސައްތަ މީހުންނެވެ.
