އިންޑިއާއިން ވައިގެ ދިފާއީ ކުޅަދާނަކަން އިތުރުކުރުމުގެ ގޮތުން އައު ފިޔަވަޅުތަކެއް އެޅުމަށް ނިންމައިފިއެވެ. މިހަފްތާގައި އިންޑިއާގެ ކެބިނެޓުން ވަނީ، އަވަހަށް އިންޒާރުދޭ ވައިގެ ދިފާއީ ނިޒާމް ގާއިމް ކުރުމުގެ ގޮތުން ހަ މަތިންދާ ބޯޓެއް އުފެއްދުމަށް ހުއްދަ ދީފައެވެ.
110 ބިލިއަން ރުޕީސް ހޭދަކޮށްގެން ކުރިއަށް ގެންދާ މި ޕްރޮޖެކްޓްގައި އިންޑިއާގެ ވައިގެ ސިފައިންނަށް، އެއަރބަސްގެ ހަ މަތިންދާ ބޯޓްގައި ރޭޑާ ސިސްޓަމް ހަރުކޮށް ހަވާލުކުރެވޭނެއެވެ. މި އެއަރބަސް 321 މަރުކާގެ މަތިންދާ ބޯޓްތަކަކީ މިހާރުވެސް އެއަރއިންޑިއާއިން ބޭނުން ކުރާ ބޯޓްތަކުގެ ތެރޭން ސިފައިންގެ ބޭނުމަށް ޑިފެންސް ރިސަރޗް އޮގަނައިޒޭޝަނުން ގަންނާނެ ބޯޓްތަކެވެ. މި ބޯޓްތަކުގައި އެޑްވާންސް ރޭޑާ ނިޒާމް ހަރުކުރުމުގެ ސަބަބުން ޕާކިސްތާނާއި ޗައިނާގެ ސަރަހައްދު މަތިން ބެލެހެއްޓުމުގެ ނިޒާމެއް ގާއިމް ކުރެވިގެން ދިޔައީއެވެ.
މީގެ އިތުރުން އިންޑިއާގެ ގައުމީ ސަލާމަތާ ބެހޭ ކެބިނެޓުން ވަނީ އެއަރބަސްއާއި ޓާޓާއާ ގުޅިގެން އިންޑިއާގައި އުފައްދާ އެއަރބަސް ސީ 295 މަރުކާގެ މެދުރާސްތާގެ ސިފައިން އުފުލާ ބޯޓުގެ 56 ބޯޓް ތިން ބިލިއަން ޑޮލަރަށް އުފެއްދުމަށް ވެސް ހުއްދަ ދީފައެވެ.
އިންޑިއާއިން ވައިގެ ތެރޭން ފާރަލުމަށް، މިހާރު ބޭނުން ކުރަނީ، އިޒްރޭލުން އުފައްދާފައިވާ ފެލަކަން އެވާކްސް ރޭޑާ ހަރުކޮށްފައިވާ ރަޝިޔާއިން އުފައްދާފައިވާ އިލްޔޫޝިން76 މަރުކާގެ ތިން ބޯޓެވެ. މީގެ އިތުރުން އިންޑިއާއިން އަމިއްލައަށް އުފައްދާފައިވާ ދެ ބޯޓެއްވެސް ގެންގުޅެއެވެ.
