ތަރައްގީވަމުން އަންނަ އިގްތިސާދުތަކުގެ އަޑު އިއްވައިދޭ މުހިންމޖު މަހްފިލެއް ކަމުގައި ބްރިކްސް ޖަމާއަތްވެގެން ގޮސްފައިވާ ކަމުގައި ވިދާޅުވަމުން އިންޑިއާގެ ބޮޑު ވަޒީރު، ނަރެންދްރަ މޮދީ، ބްރިކްސްގެ މަޖާޒީ ސަމިޓް އިފްތިތާހު ކޮށްދެއްވިއެވެ. އިންޑިއާއާއި ރަޝިޔާއާއި ޗައިނާއާއި ބްރަޒީލާއި ދެކުނު އެފްރިކާ ހިމެނޭ މި ޖަމާއަތަކީ އިގްތިސާދީ ތަރައްގީއަށް މަސައްކަތް ކުރާ ކުރިއަރަމުންދާ ސިނާއީ ގައުމުތަކެވެ.
ދިހަ އަހަރިގެ ތެރޭގައި ބްރިކްސްއިން ބޮޑެތި ކާމިޔާބީތައް ހޯދާފައިވާ ކަމަށާއި، އަދި ކުރިއަށް އޮތް ފަސް އަހަރުގެ ތެރޭގައި ބްރިކްސް ވެގެންދާނީ ބޮޑު އިގްތިސާދީ ޖަމާއަތަކަށް ކަމަށް، ބްރިކްސްގެ ރިއާސަތު ބަލަހައްޓަވަމުން މޮދީ ވިދާޅުވިއެވެ.
ބްރިކްސްގެ ސަމިޓް ނިންމާލާފައި ވަނީ ޓެރަރިޒަމާ ދެކޮޅަށް މަސައްކަތް ކުރުމަށް އެއް އަޑަކުން މި ޖަމާއަތުން އެއްބަސްވެގެންނެވެ. އަދި ދުނިޔޭގެ މަލްޓިލެޓަރަލް ސިސްޓަމް އިތުރަށް ހަރުދަނާ ކުރުމަށް އެއްބަސް ވަމުންނެވެ.
މި ޖަމާއަތަކީ ދުނިޔޭގެ އާބާދީގެ 41 އިންސައްތަ ތަމްސީލުކުރާ ގައުމުތަކެވެ. އަދި މިއީ ދުނިޔޭގެ ޖީޑީޕީގެ 24 އިންސައްތަ އުފައްދާ ގައުމުތަކެވެ. އަދި މިގައުމުތަކުން ދުނިޔޭގެ ވިޔަފާރގެ 16 އިންސައްތަ ޙިއްސާ ކުރެއެވެ.
