އިނގިރޭސިވިލާތުގެ ގައުމީ ސަލާމަތާ ގުޅުން ހުރި ކުންފުންޏެއްގެ ހިއްސާ ޗައިނާއިން ގަތުމުން އެކަން ބެލުމުގެ މަސައްކަތް އިނގިރޭސި ސަރުކާރުން ފަށައިފިއެވެ. އިނގިރޭސި ސަރުކާރުން ބަލަމުން ދަނީ ވޭލްސްގައި ރަޖިސްޓްރީ ކޮށްފައިވާ ގްރެފީން މާއްދާ އުފައްދާ ކުންފުންޏެއް، ޗައިނާއާ ގުޅުން ހުރި، ގޮތް ނޭނގޭ ކުންފުންޏަކުން ގަތުމާ ގުޅިގެންނެވެ.
ގްރެފީން އަކީ އަލަށް އީޖާދުކޮށްފައިވާ، ސިއްޙީ ދާއިރާއިން ފެށިގެން މަތިންދާބޯޓު އުފެއްދުމުގެ ސިނާއަތާ ހަމައަށް، ސިނާއީ އެތައް ދާއިރާއެއްގައި އޭގެ ބޭނުން ކުރެވޭ ފަދަ މާއްދާއެކެވެ.
އިންސާނުން މިހާތަނަށް އުފައްދާ ފައިވާ އެންމެ ތުނި މަސްނޫއީ މާއްދާކަމަށްވާ، ގްރެފީން އުފައްދާ ވޭލްސްގެ ޕާޕެޓަސް ކުންފުނި ގަނެފައި ވަނީ ޓާރަސް ކުންފުނިންނެވެ. މިއީ ޗައިނާއާ ގުޅުންހުރި، ޗައިނާގައި އިންވެސްތް ކޮށްފައިވާ، އިނގިރޭސިވިލާތުގައި އެކަހެރި ގެއެއްގައި ރަޖިސްޓްރީ ކޮށްފައިވާ އެންމެ މީހަކު ޑައިރެކްޓަރަކަށް ހުންނަ ކުންފުންޏެކެވެ. ޗައިނާގެ ނަމަކުން ނަން ކިޔާފައިވާ މިމީހާއަކީ ގްރެފީންއާ ގުޅުންހުރި އެހެން ކުންފުނިތަކަށްވެސް ޝައުގުވެރިކަން ފާޅުކޮށްފައިވާ މީހެކެވެ.
2004ގައި ޔުނިވަރސިޓީ އޮފް މެންޗެސްޓަރއިން އީޖާދުކޮށްފައިވާ ގްރެފީން މާއްދާއަކީ އެތައް ސިނާއަތެއްގައި ބޭނުން ކުރެވޭ، އަދި ތަކެތި ހަލާކު ވިޔަނުދިނުމުން ސަލާމަތް ކުރުމަށް ބޭރުން ދުލި ފަށަލައެއްގެ ގޮތުގައި ލުމަށް ބޭނުންކުރާ މާއްދާއެއްވެސް މެއެވެ.
ޗައިނާގެ ދިހަ ސަރަހައްދެއްގައި ގްރެފީން މާއްދާއާ ބެހޭ ދިރާސާތައް ކުރެވެމުން ދެއެވެ. އަދި މި ދާއިރާގައި ސީދާ ގޮތެއްގައި ޗައިނާގެ 200 ކުންފުނިން މަސައްކަތް ކުރާކަމަށްވެސް ވެއެވެ.
ޕާޕެޓަސް ކުންފުނިން އުފައްދާ ގްރެފީން މަތިންދާބޯޓް އުފެއްދުމުގެ ދާއިރާގައިވެސް ބޭނުން ކުރެވެއެވެ.
ޗައިނާއަށް ގްރެފީން މާއްދާގެ މުހިންމުކަން އިޙުސާސް ކުރެވުމުން، މެންޗެސްޓަރގެ ނޭޝަނަލް ގްރެފީން އިންސްޓިއުޓްގައި ޗައިނާގެ ވާވޭ ކުންފުނިން 2015ގައި އިންވެސްޓް ކުރިއެވެ.
އިނގިރޭސިވިލާތުގެ އޭ1 ހައިވޭގެ މަތީފަށަލަ ހިމާޔަތް ކުރުމުގެ ގޮތުން ތާރުގެ މަތިން ގްރެފީން ފަށަލައެއް ދަވާދުގެ ސިފައިގައި، ލާފައި ޓެސްޓް ކޮށްފައިވާ ކަމަށް ބީބީސީން ރިޕޯޓް ކޮށްފައި ވެއެވެ. މިއީ މަގެއްގެ މަތީ ފަށަލަ ހިމާޔަތް ކުރުމަށ ގްރެފީން ބޭނުން ކުރި އެންމެ ފުރަތަމަ ފަހަރެވެ.
