ފޭރާން ވިއުމުގެ ދާއިރާގައި އައު މާއްދާތައް ބޭނުން ކުރާ ފަރާތްތަކަށް އުފެއްދުމާ ގުޅިގެން ހިތްވަރު ދިނުމުގެ ސްކީމެއް އިންޑިއާ ސަރުކާރުން ތައާރަފް ކޮށްފިއެވެ. އިންޑިއާއިން ފޭރާން ވިއުމުގައި ބޭނުން ކުރަނީ ގުދުރަތީ މާއްދާ ކަމަށްވާ ކަފައާއި އެފަދަ ޠަބީއީ މާއްދާތަކެވެ.
އިއްޔެ އިންޑިއާ ކެބިނެޓުން ފާސްކޮށްފައި ވަނީ މަސްނޫއީ ރޮއްޖާއި ނަރު ހިމެނޭ މާއްދާތައް ބޭނުން ކޮށްގެން ފޭރާން ވިޔާފަރަތާކަށް ސަރުކާރުން ހިތްވަރު ދިނުމަށެވެ.
ފޭރާމާއި ވިއެފައިވާ ތަކެތި ވިއުމުގެ ދާއިރާގައި ބައިނަލްއަގްވާމީ ފެންވަރުގައި އުފައްދާ ސާމާނުގެ ތިންބައިކުޅަ ދެބައިގައި ހިމެނީ މަސްނޫއީ ގޮތަށް އިންސާނުން އުފައްދާފައިވާ ރޮއްޖާއި ނަރުން ވިއެފައިވާ ތަކެއްޗެވެ.
އިންޑިއާއިން އަމާޒު ހިފާފައި ވަނީ މޭން މޭޑް ފައިބަރ އުފެއްދުމަށް، 100 ބިލިއަން އާއި 300 ބިލިއަން ރުޕީސްއާ ދެމެދުގެ އަދަދެއް ކަނޑައެޅުމަށެވެ. އަދި މިދާއިރާ ތަރައްގީ ކުރެވިއްޖެނަމަ، މިއިން އަށް ލައްކައެއްހައި މީހުންނަށް ވަޒީފާގެ ފުރުސަތު ފަހިވެގެން ދާނެއެވެ.
އިންޑިއާއިން ހިންގާ އަމިއްލަ އުފެއްދުމަށް ހިތްވަރު ދިނުމުގެ މަޝްރޫއުގެ ދަށުން ޕްރޮޑަކްޝަން ލިކްޑް އިންސެންޓިވްގެ ނަމުން ދާއިރާތަކެއް ކަނޑައަޅައި އެދާއިރާތަކުން އުފައްދާ ތަކެތި އުފައްދައި އެއިން އާމްދަނީ ލިބޭ ނިސްބަތުން ސަރުކާރަށް ލިބޭ އާމްދަނީން ބައެއް އަނބުރައި ކުންފުނިތަކަށް ދޭ ނިޒާމެއް ވަނީ ގާއިމް ކޮށްފައެވެ. މި ނިޒާމުގެ މަގްސަދަކީ އިންޑިއާގައި ނެތް އުފެއްދުމުގެ ދާއިރާތަކުން ބޭރުގެ އިންވެސްޓަރުން އިންޑިއާއަށް ގެނައުމާއި އެފަދަ އުފެއްދުންތައް ތައާރަފް ކުރުމެވެ.
