ކަޝްމީރުގެ ފަންނުވެރިންގެ ކުރެހުންތައް ދައްކާލުމަށް ދާއިމީ މައުރަޒެއް ސްރީނަގަރުގައި ގާއިމް ކޮށްފިއެވެ. 18 ވަނަ ގަރުނުގެ އާސާރީ އިމާރާތުގައި ކުރިން ހިނގަމުން އައި ސިވިލްސާވިސްގެ އޮފީސް ބަދަލުކުރުމަށްފަހު އެތަން ވަނީ އާޓް ގެލެރީއަކަށް ބަދަލުކޮށްފައެވެ.
މިހާރު ގެލެރީގައި ތިންސަތޭކަ އަހަރު ކުރީގެ ކުރެހުންތައްވެސް ބަހައްޓާފައި ވެއެވެ. މިއީ ޖައްމޫ ކަޝްމީރުގައި ހުޅުވި ފުރަތަމަ އާޓް ގެލެރީއެވެ.
މި އާޓް ގެލެރީ ހިމެނޭ ގަނޑުވަރަކީ، އަފްޣާނިސްތާންގެ ގަވަރުނަރު ޖަވާން ޝޭރް ޚާން ކަޝްމީރުގައި ވެރިކަން ކުރި ޒަމާނުގައި އިމާރާތް ކޮށްފައިވާ ގަނޑުވަރެކެވެ. 1772ގައި އިމާރާތް ކޮށްފައިވާ މި ގަނޑުވަރުގެ ނަމަކީ ޝޭގާރީ ޕެލަސް އެވެ. ފަހުން މި ގަނޑުވަރު ބޭނުން ކޮށްފައި ވަނީ ގާނޫނު ހަދާ މަޖިލީހަކަށާއި ސަރުކާރު ހިންގާ އިމާރާތެއްގެ ގޮތުގައެވެ. ނަމަވެސް މިހާރު މިއީ އާޓާއި ފަންނީ މައުރަޒުތަކަށް ޚާއްސަ ގަނޑުވަރެކެވެ. މި އިމާރާތް މަރާމާތު ކުރުމަށް ތިން އަހަރު ހޭދަ ކޮށްފައި ވެއެވެ.
