އިންޑިއާގެ ވިޔަފާރި ފުޅާ ކުރުމުގެ ގޮތުން ޖޯރޖިއާއެކު މިނިވަން ވިޔަފާރީގެ އެއްބަސްވުމެއް އެކުލަވާ ލުމަށް ނިންމައިފިއެވެ. ޖޯރޖިޔާއިން ބުނާ ގޮތުގައި އެގައުމުން އުފައްދާ ދަނޑުވެރިކަމުގެ ބާވަތްތަކާއި، ވައިން އިންޑިއާއަށް އެކސްޕޯޓް ކުރަން ބޭނުން ވެއެވެ. އަދި އިންޑިއާއަކީ ޖޯރޖިއާގެ ތަރައްގީއަށް މުހިންމު ހިއްސާއެއްވާ ގައުމެއްކަމަށްވެސް ޖޯރޖިއާގެ ފޮރިން މިނިސްޓަރ ޑޭވިޑް ޒަލްކަލިއާނީ ވިދާޅުވެއެވެ.
އިންޑިއާގެ އިސް މަސްއޫލުވެރިއަކު ޖޯރޖިއާއަށް ފުރަތަމަ ރަސްމީ ދަތުރުފުޅެއް ކުރެއްވީ، މިދިޔަ ޖުލައި މަސް ތެރޭގައެވެ. އެކްސްޓަނަލް އެފެއާޒް މިނިސްޓަރ އެސް ޖަޔަޝަންކަރު ކުރެއްވި ދަތުރުފޅުގައި އެތައް ދާއިރާއަކުން ދެގައުމު ދެމެދު އެއްބަސްވުންތަކުގައި ސޮއިކޮށްފައި ވެއެވެ.
ޖޯރޖިއާގެ ފޮރިން މިނިސްޓަރ ވިދާޅުވިގޮތުގައި އިންޑިއާއާއި ޖޯރޖިއާ ދެމެދު މިނިވަން ވިޔަފާރީގެ އެއްބަސްވުމެއްގައި ސޮއިކުރެވުމުން، އިންޑިއާގެ އުފެއްދުންތައް ޔޫރަޕަށް ބޭރުކުރުމަށްވެސް ފަސޭހަވެގެން ދާނެއެވެ.
