ތާލިބާންގެ ސިޔާސީ މަގްސަދުގައި ދެ ވައްތަރަކަށް މުސްލިމުން ގިންތިކޮށްފައި ވެއެވެ. އެއީ ހައްގު ހޯދައި ދޭން ޖެހޭ ބަޔަކާއި، އެބައެއްގެ ހައްގުތައް މަތިން ހަނދާން ނައްތާލަން ޖެހޭ ބައެކެވެ. ފުރަތަމަ ގިންތީގައި ހިމެނެނީ، ކަޝްމީރު މުސްލިމުންނެވެ. ދެވަނަ ގިންތީގައި ޗައިނާގެ އުއިގޫރު މުސްލިމުންނެވެ. ތާލިބާނުން ކާބުލް ހިފުމަށްފަހު ޕާކިސްތާންގެ އާރީ ނިއުސްއާ ވާހަކަ ދައްކަމުން ތާލިބާންގެ ތަރުޖަމާން ސުހައިލް ޝާހީން ބުނެފައި ވަނީ ތާލިބާނުން އުއިގޫރު މުސްލިމުންގެ މައްސަލާގައި ޗައިނާގެ ބޮލު ރިހުމަކަށް ނުވާނެ ކަމަށެވެ.
ތާލިބާންގެ ސަރުކާރުން ދީފައިވާ ބައެއް ބަޔާންތަކުން އެމީހުން ދައްކަން ބޭނުންވަނީ ތާލިބާނަކީ މުސްލިމުންގެ މައްސަލަތަކަށް ވަކާލާތު ކުރުމަށް ޗެމްޕިއަނުންނަށް ވާނެ ބަޔެއް ކަމަށެވެ. ކުރީގެ ޒަމާނުގެ ގައްޒާފީއާ އެއްފަދައިން ނުވަތަ ފަހުޒ ަމާނުގެ އުރުދުޣާންއާ އެއްފަދައިން ނެވެ.
ބީބީސީއަށް ދިން އިންޓަރއުއެއްގައި ސުހައިލް ޝާހީން ބުނެފައި ވަނީ ތާލިބާނުން މުސްލިމުންގެ ހައްގުގައި ކޮންމެ ތަނެއްގައިވިއަސް ވަކާލާތު ކުރާނެ ކަމަށެވެ. އިންޑިއާގައިވިއަސް މުސްލިމުންގެ ހައްގުގައި ވާހަކަ ދައްކާނެ ކަމަށެވެ.
މިވާހަކަތަކާއި ތާލިބާނުން ތަކުރާރު ކުރާ އަފްޣާނިސްތާންގެ ބިންތައް އެހެން ގައުމުތަކާ ދެކޮޅަށް ބޭނުން ނުކުރާނެ ކަމަށް ބުނާ ވާހަކަ ގަބޫލުކުރަން ބޭނުންވާ މީހުންނަށް ނުތަނަވަސް ކަމެއް ލިބެއެވެ. އަދި ތާލިބާނުގެ އެތެރޭގައި ތިބި ބައެއް މީހުންނަށްވެސް ފުށުއަރާ ވާހަކަތަކެއް ކަމަށް މިވާހަކަތައް ފެނެއެވެ.
ދޯހާގައި ހުންނަ ތާލިބާންގެ އޮފީހުގެ ދެވަނަ ވެރިއާ ޝޭރު މުޙައްމަދު އައްބާސް ސްޓެކްނާޒީ ބުނެފައި ވަނީ، ތާލިބާނުން ބޭނުން ވަނީ ކުރިން އަފްގާން ސަރުކާރުން ގެންގުޅުފަދަ ގާތް ކަމެއް އިންޑިއާއާއެކު ބާއްވާށެވެ. އޭނާ ބުނެފައި ވަނީ ސަގާފީ، އިގްތިސާދީ އަދި ވިޔަފާރީގެ ގުޅުން ކުރިން އޮތް ގޮތަށް ދަމަހައްޓަން ބޭނުންވާ ކަމަށެވެ. އަދި އިތުރަށް އޭނާ ބުނެފައި ވަނީ އީރާންގައި އިންޑިއާއިން ހަދަމުންދާ ޗާބާރު ޕޯޓް ކުރިއަށް ގެންގޮސް، އަފްޣާނިސްތާނަށް މުދާ އެތެރެ ކުރުމުގައި މި ބަނދަރު ބޭނުން ކުރުމަކީވެސް ތާލިބާނުން ބޭނުންވާ ކަމެއް ކަމަށެވެ.
އިންޑިއާގެ ނަން ކިޔައި ދީފައި ހުންނަ މިފަދަ ބަޔާންތަކުން ތާލިބާންގެ ސަރުކާރުން އިންޑިއާއަށް ތަސައްލީއެއް ލިބިދާނެ ކަމަކަށް އިންޑިއާއިން ނުދެކެއެވެ. އިންޑިއާގެ އެންމެ ހަތުރު ދެ ގައުމު ކަމަށްވާ ޗައިނާއާއި ޕާކިސްތާނުން ތިބީ ތާލިބާނާ ކޮނޑާ ކޮނޑު ޖައްސައިގެންނެވެ.
ޕާކިސްތާނުން މިހާރު ތާލިބާނާ މެދު ވާހަކަ ސދައްކަން ފަށާފައި ވަނީ ވަރަށް ބާރު ހުރި ގޮތަކަށެވެ. އީރާންގެ މަސްއޫލު ވެރިން ތުހުމަތު ކުރާ ފަދައިން ޕަންޖްޝޭރްގައިވެސް ޕާކިސްތާނުން ދަނީ ތާލިބާނަށް އަސްކަރީ އެހީތެރިކަން ފޯރުވައި ދެމުންނެވެ. އަދި ތާ،ލިބާންގެ ސަރުކާރު އެކުލަވާލުމުގައި ތާލިބާންގެ ފެކްޝަންތަކުގެ މެދުގައި އުފެދުނު ދެބަސްވުން ހައްލު ކޮށްދިނީ، ޕާކިސްތާންގެ ޖާސޫސީ އިދާރާގެ ވެރިޔާއެވެ.
ދުނިޔޭގެ ކަންކޮޅުތަކުގައި މުސްލިމުންގެ ހައްގަށް ވަކާލާތު ކުރާނެ ކަމަށް ބުނާ އިރު ތާލިބާނުން އަމިއްލަ ވެރިކަމުގައި ހިމެނޭ އަންހެނުންގެ ހައްގަށް އިހުތިރާމެއް ނުބަހައްޓައެވެ. އަދި ޝިންޖިއާންގައި ޗައިނާއިން ހިންގާ މުސްލިމުންގެ އަމިއްލަވަންތަކަން ފޮހެލުމުގެ ޖަރީމާތަކާ ދެކޮޅަށް އަޑު އުފުލާކަށް ތާލިބާނުން ބޭނުމެއް ނުވެއެވެ.
ޗައިނާއިން ތާލިބާނާ މެދު ނުރުހުނަސް މަސްލަހަތަށްޓަކައި ތާލިބާނަކީ ގުޅުން ބާއްވަން ޖެހޭ ފުރޭތައެއް ކަމުގައި ޗައިނާއިން ދެކޭނެއެވެ. ހަމައެފަދައިން ޗައިނާއަކީ އަފްޣާނިސްތާނަށް ބޭނުންވާ އެހީ ލިބެން ހުރި ވަގުތީ ވަސީލަތެއް ކަމަށް ބަލައި ޗައިނާ އަކީ ގުޅުން ބާއްވަން ޖެހޭފަދަ ފުރޭތައެއް ކަމުގައި ތާލިބާނުން ދެކެނެއެވެ.
އިޓަލީގެ ޓީވީއަކަށް 2 ސެޕްޓެމްބަރުގައި ޒަބީހުﷲ މުޖާހިދު ދިން އިންޓަރވިއުގައި ބުނެފައި ވަނީ ތާލިބާނުން ޗައިނާއާ ގުޅިގެން މަސައްކަތް ކުރާނެ ކަމަށެވެ. އަދި ޗައިނާއަކީ އަފްޣާނިސްތާންގެ ތަރައްގީއަށް މުހިންމު ބައިވެރިއެއް ކަމަށެވެ.
