އަފްޣާނިސްތާންގެ ސިޔާސީ މައްސަލަތައް ޙައްލު ނުކެރެވެނީ ނަމަ އިޖުތިމާއީ ކާރިސާއަކާ ކުރިމަތިލާން ޖެހިދާނެ ކަމަށް ޔޫއެންޑީޕީން އިންޒާރުކޮށްފިއެވެ. ޔޫއެންޑީޕީން ބުނާ ގޮތުން ސިޔާސީ މައްސަލަތަކާ ހެދި އަފްޣާނިސްތާންގެ އާބާދީގެ 97 އިންސައްތަ މީހުން އަންނަ އަހަރުގެ މެދެއްހާ ތާނގައި ފަގީރުކަމުގެ މިންގަނޑުގެ އެންމެ ދަށަށް ވެށްޓިގެންދާނެއެވެ.
އަފްޣާނިސްތާނަށް ދިމާވާން އޮތީ ތަރައްގީގެ ގޮތުން ޖެހުންތައް ކަމަށް ޔޫއެންޑީޕީން 9 ސެޕްޓެމްބަރުގައި ޝާއިއުކުރި ރިޕޯޓްގައި ބުންޏެވެ.
އަފްޣާނިސްތާންގެ އާބާދީ ފަގީރުވެގެންދާނެ ސަބަބުތައް ކަމުގައި ޔޫއެންޑީޕީން ބުނެފައި ވަނީ އެގައުމަށް ދިމާވެފައިވާ ދިގު ދެމިގެން ގޮސްފައިވާ ހަނަފަސްކަމާއި، ގައުމުގެ ރިޒާވް ފައިސާ ހިފަހަށްޓާފައި ވުމާއި، މާލީ ދާއިރާ ބަނގްރޫޓުވުމާއި، ބޭންކިންގ ނިޒާމަށް ޕްރެޝަރު ބޮޑުވެފައި ވުމެވެ.
އދގެ ސެކްރެޓެރީ ޖެނެރަލްވެސް ވަނީ އަފްޣާނިސްތާންގައި އިންސާނީ ކާރިސާއެއް ކުރިމަތިވާނެ ކަމަށް އިންޒާރު ކުރައްވާފައެވެ. އަދި އަފްޣާނިސްތާނަށް އަވަސް އެހީއަށް ބޭނުންވާނެ ކަމަށްވެސް އޭނާ ވަނީ ވިދާޅުވެފައެވެ. އަދި ބައިނަލްއަގްވާމީ މުޖުތަމައިން މިކަމުގައި އަވަސް ފިޔަވަޅުތައް އެޅުމަށް އޭނާ ވަނީ އެދިވަޑައިގެންފައެވެ.
