ޕާކިސްތާންގެ މީޑިއާގެ މިނިވަންކަން ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތާ ދެކޮޅު ހެދުމުގެ ގޮތުން ޕާލަމެންޓްގެ ކުރިމަތީގައި އިށީދެ ތިބެގެން ނޫސްވެރިން އިއްޔެ މުޒާހަރާ ކޮށްފިއެވެ. މި މީހުން ބުނާ ގޮތުން ޕާކިސްތާންގެ ރައީސް އާރިފް އަލަވީ، ޕާލަމެންޓްގެ ދެ ގޭގެ ގުޅިފައިވާ ބައްދަލުވުމާ މުޚާތަބު ކުރެއްވުމާ ހަމައަށް އެމީހުން މުޒާހަރާ ކުރުންމަތީގައި ދެމި ތިބޭނެއެވެ.
މި މުޒާހަރާއަކީ ޕާކިސްތާންގެ ނޫސްވެރިން ތަމްސީލުކުރާ އެތައް އިދާރާއެއް ބައިވެރިވެގެން އިންތިޒާމުކޮށްފައިވާ މުޒާހަރާއެކެވެ.
އމްރާން ޚާންގެ ސަރުކާރުން ވަނީ މީޑިއާއާއި ޚިޔާލު ފާޅުކުރުމާ ދެކޮޅަށް ހަރުކަށި ސިޔާސަތެއް ގެންގުޅެން ފަށާފައެވެ. ޚާންގެ ސަރުކާރުން ބޭނުން ވަނީ، މީޑިއާ ޑިވެލޮޕްމެންޓް އޮތޯރިޓީގެ ނަމުގައި އައު އިދާރާއެއް އުފައްދައި އެއިދާރާ މެދުވެރިކޮށް ނޫސްތަކާއި އިލެކްޓްރޯނިކް މީޑިއާ ކޮންޓްރޯލު ކުރާށެވެ. ނޫސްވެރިން ދެކޭ ގޮތުގައި ކޮންމެ މީޑިއަމެއް ނުވަތަ ޚަބަރު ފަތުރާ ކޮންމެ ވަސީލަތަކީ އޭގެ ޚާއްސަ ކަމެއް ހިމެނޭ ކަމެއްކަމުން ހުރިހައި ވަސީލަތަކަށް އެއް ހަމައެއް ނުހިންގޭނެއެވެ. އަދި ސަރުކާރުން ހުށަހަޅާފައިވާ ގާނޫނުގެ ސަބަބުން މީޑިއާގެ މިނިވަންކަން ގެއްލި ސަރުކާރަށް މީޑިއާ ސެންސަރު ކުރުމަށް ފުރުސަތު ލިބޭނެކަމަށްވެސް ބެލެވެއެވެ.
ޕާކިސްތާނުގައި ސިޔާސީ މައިދާން ކޮންޓްރޯލް ކުރާ ސިފައިން، މީޑިއާއަށް އިންތިހާއަށް ޖެހިލުން ވެއެވެ. ސިފައިންގެ ނާޖާއިޒު ކަންކަން ބޭޒާރުކޮށްލާ ފަރާތްތައް ވަގަށް ނެގުމާއި އަނިޔާކުރުމާއި ބަޑީގެ ހަމަލަތައް އމާޒު ކުރުމަކީ އާދައިގެ ކަމެކެވެ. ޕާކިސްތާނަކީ ނޫސްވެރިކަން ކުރުމަށް ދުނިޔޭގެ އެންމެ ނުރައްކާ ގައުމުތަކުގެ ތެރޭން ކުރީގައި އުޅޭ ގައުމެކެވެ.
ނޫސްވެރިން ސިފަ ކުރާ ގޮތުގައި އައު ގާނޫނުން ސަރުކާރުން ބޭނުން ވަނީ ނޫސް މީޑިއާއަށް ސިފައިންގެ ވެރިކަމެއް ތައާރަފް ކުރަށެވެ.
