ކުއޯޑަކީ ޗައިނާއާ ދެކޮޅަށް މަސައްކަތް ކުރާކަމަށް ޗައިނާއިން ތުހުމަތު ކުރާ ހަތަރު ގައުމުގެ ޖަމާއަތެވެ. އެމެރިކާއާއި އިންޑިއާއާއި އޮސްޓްރޭލިއާ އަދި ޖަޕާން ބައިވެރިވާ މި ހަތަރު ގައުމުގެ ވެރިންގެ ބައްދަލުވުމެއް މިމަހު 24 ގައި އެމެރިކާގައި އޮންނާނެއެވެ. އެމެރިކާގެ ރައީސް ޖޯ ބައިޑެން ބާއްވަވާ މި ބައްދަލު ކުރެއްވުމުގައި މި ހަތަރު ގައުމުގެ ވެރިން ބައިވެރިވެ ވަޑައިގަންނަވާނެއެވެ.
އިންޑިއާ ތަމްސީލް ކުރައްވާނީ އިންޑިއާގެ ބޮޑު ވަޒީރެވެ. އިންޑިއާއަކީ ކުއޯޑްގައި އަސްކަރީ ހަރަކާތްތަކުގައި އިސް ދައުރެއް އަދާކުރާ ގައުމެކެވެ. އޮސްޓްރޭލިއާގެ ބޮޑު ވަޒީރު ސްކޮޓް މޮރިސަންއާއި ޖަޕާނުގެ ބޮޑު ވަޒިރު ޔޯޝިހިޑޭ ސޫގާވެސް ބައިވެރިވެ ވަޑައިގަންނަވާނެއެވެ.
މި ހަތަރު ގައުމުން މަޝަވަރާ ކުރާނެ ކަންކަމުގެ ތެރޭގައި އިންޑިއާ ކަނޑާއި ޕެސިފިކް ކަނޑު ހުޅުވާފައި ބޭއްވުމާއި ކޮވިޑް19 ވެކްސިން ގައުމުތަކަށް ފޮނުވުމާ ބެހޭ ގޮތުން މަޝްވަރާ ކުރައްވާނެއެވެ.
މި ބައްދަލުވުމަކީ މި ހަތަރު ގައުމުގެ ވެރިން ޝަޚްސީ ގޮތުން ބައްދަލުވެ ވަޑައިގަންނަވާ ފުރަތަމަ ފަހަރެވެ. މީގެ ކުރިން މި ބޭފުޅުން ސަމިޓެއް ބާއްވަވައި ފައިވަނީ މަޖާޒީ ގޮތަކަށެވެ.
