އިންޑިއާއިން އަފްޣާނިސްތާން ރައްޔިތުންނަށް އެހީވާނެ ކަމުގެ ޔަގީންކަން އިންޑިއާގެ ޚާރިޖީ ވަޒީރު އެސް ޖަޔަޝަންކަރު ދެއްވައިފިއެވެ. އަފްޣާނިސްތާންގެ އިންސާނީ އެހީދިނުމާ ބެހޭ ގޮތުން ބޭއްވި އދގެ މަތީ ފެންވަރުގެ ބައްދަލުވުމުގައި ވާހަކަ ދައްކަވަމުން ޖަޔަޝަންކަރު ބާރުއެޅުއްވީ އަފްޣާނިސްތާނަށް އެހީތެރިވެ ދިނުމުގައި އދން އިސް ދައުރެއް އަދާކުރުމަށެވެ.
ތާލިބާނުން ކާބުލް ހިފި ފަހުން ގައުމުތަކުން ވަނީ އަމިއްލައަށް ތާލިބާނާ ސައްލާކޮށް ހަދާފައެވެ. އަދި ތާލިބާނާއެކު އަފްޣާނިސްތާނުގެ މީހުން ބިކަވެ ގައުމު ބަނޑަށް ޖެހޭނެކަމަށް ޔޫއެންޑީޕީއާއި އެހެން އިދާރާތަކުން އެންގުމުން ދުނިޔެއިން އަފްޣާނިސްތާނަށް އެހީވާން ހަރަކާތްތެރިވާން ފަށާފައި ވެއެވެ.
އދގެ މަތީ ފެންވަރުގެ ކޮމިޓީގައި ވާހަކަ ދައްކަވަމުން ޖަޔަޝަންކަރު ވިދާޅުވީ މާޒީގައިވެސް އިންޑިއާއިން އަފްޣާން ރައްޔިތުންނަށް އެހީތެރިވެ ދިން ގޮތަށް މިހާރުވެސް އޮތީ އެހީތެރިވާށެވެ. އަދ އދން ފާސްކޮށްފައިވާ 2593 ގަރާރާ އެއްގޮތަށް އަމަލު ކުރުމުގެ މުހިންމުކަމުގެ މައްޗަށް ވާހަކަ ދައްކަވަމުން އޭނާ ވިދާޅުވީ ބައިނަލްއަގްވާމީ މުޖުތަމައިން އަފްގާނިސްތާނަށް އެހީވެ ދިނުމުގައި އެކަތިގަނޑަކަށް ވާންވާނެ ކަމަށެވެ.
އިންޑިއާއިން އަބަދުވެސް ބާރު އަޅަނީ އަފްޣާނިސްތާންގެ މައްސަލަ ހައްލުކުރުމަށް އދގެ އިސްނެގުމުގެ މަތިން މަސައްކަތް ކުރާށެވެ.
ރޫސީވިލާތުން އަފްޣާނިސްތާން ހިފި މައްސަލާގައިވެސް އިންޑިއާއިން ބުނަމުން ގޮސްފައި ވަނީ އދގެ ބެލުމުގެ ދަށުން މައްސަލަ ހައްލު ކުރުމަށް ދުނިޔޭގެ ގައުމުތަކުން މަސައްކަތް ކުރުމަށެވެ.
