ޕާކިސްތާންގެ ދަށުގައިވާ ކަޝްމީރުގައި މީހުން ޕާކިސްތާނުގެ ސަރުކާރާ ދެކޮޅަށް މުޒާހަރާތައް ބާއްވަން ފަށައިފިއެވެ. ކަޝްމީރުގެ ޕާކިސްތާނާ ވީފަޅީގައި މީހުން ބުނާ ގޮތުން ޕާކިސްތާނުން އެމީހުންގެ ބިންތަކުން ނަފާ ނަގާއިރު އޭގެ ފައިދާ އެމީހުންނަކަށް ނު ފޯރައެވެ. އަދި އެމީހުންގެ ހާލަތާ މެދު މީޑިއާގައި ވާހަކަ ދައްކާކަށް ފުރުސަތެއް ނޯންނަ ކަމަށާއި ޕާކިސްތާނުން މީޑއާ ސެންސަރު ކުރަމުންދާ ކަމަށެވެ.
މި ސަރަހައްދުތަކުގައި އިންސާނީ ހައްގުތަކުގެ މައްސަލަތައް އުޅޭ ކަމަށާއި ޕާކިސްތާނު ސަރުކާރަށް ހިފާފައިވާ ކަޝްމީރުގެ ބިންތަކުގެ މީހުންނާ މެދު މުއާމަލާތު ކުރެވެނީ ދޮން ދަރިއެއް ފަދައިންނެވެ.
ކަޝްމީއުގައި ޕާކިސްތާން ސަރުކާރާ ދެކޮޅަށް މިއަހަރުގެ ޖުލައި މަސް ތެރޭގައިވެސް މުޒާހަރާ ކޮށްފައި ވެއެވެ. ޖުލައި މަހުގެ މުޒާހަރާގައި މީހުން އާޒާދީގެ ގޮވެލިތައް ގޮވައި، ގޮވާލާފައި ވަނީ މިނިވަންކަމަށެވެ.
ކަޝްމީރުގައި އެންމެ ފަހުން ބާއްވާފައިވާ އިންތިޚާބުގައި 45 ގޮނޑީގެ ތެރޭން 25 ގޮނޑި ކާމިޔާބު ކޮށްފައި ވަނީ ބޮޑު ވަޒީރު އިމްރާން ޚާންގެ ތަޙްރީކޭ އިންސާފް ޕާޓީންނެވެ. ކަޝްމީރުގައި މި ނަތީޖާއަށް ދެކޮޅު ހެދިމީހުން ބުނެފައި ވަނީ މިއީ ސިފައިން އަޑީގައި ތިބެގެން ތަހްރީކޭ އިންސާފް ޕާޓީއަށް ހޯދާދީފައިވާ ކާމިޔާބީއެއް ކަމަށެވެ. އަދި އިދިކޮޅު ފަރާތްތަކުން ބުނިގޮތަށް މިމީހުންވެސް ބުނެފައި ވަނީ ވޯޓް އޮޅުވާލާފައިވާ ކަމަށެވެ.
