އަފްޣާނިސްތާންގައި ތާލިބާނުން ކުރި ހޯދުމާ ގުޅިގެން އެމެރިކާގެ ކޮންގްރެސްގައި ޕާކިސްތާނާ ދެކޮޅަށް ޝުއޫރުތައް ފާޅުކޮށްފިއެވެ. އެމެރިކާގެ ކޮންގްރެސްގައި ޚާރިޖީ ވަޒީރާއެކު ބާއްވާފައިވާ ޖަލްސާގައި މެމްބަރުން ވަނީ ޕާކިސްތާނާ މެދު އެމެރިކާއިން ހަރުކަށި ސިޔާސަތެއް ގެންގުޅުމަށާއި އެމެރިކާއާއި ޕާކިސްތާންގެ ގުޅުން މުރާޖައާ ކުރުމަށް ވާހަކަ ދައްކަވާފައެވެ.
އެމެރިކާގެ ކޮންގރެސްގެ މެމްބަރުން ވިދާޅުވެފައި ވަނީ ޕާކިސްތާނުގެ މަދަދާ ހެދި ނޫންނަމަ، ތާލިބާނަށް އަފްޣާނިސްތާންގައި ކާމިޔާބީއެއް ނުލިބުނީސް ކަމަށެވެ. އަދި މިދިޔަ 20 އަހަރުގެ ތެރޭގައި ޕާކިސްތާނުން އަމަލު ކޮށްފައިވާ ގޮތާއި ތާލިބާނާއެކު ބާއްވާފައިވާ ގުޅުމަށް ބަލައި ޕާކިސްތާންގެ ސުލޫކު ވަޒަން ކުރުމަށްވެސް މެމްބަރުން ވަނީ ހަރުކަށި ކޮށް ވާހަކަ ދައްކަވާފައެވެ.
އެމެރިކާގެ ޚާރިޖީ ވަޒިރު އެންތޮނީ ބްލިންކެން ވިދާޅުވެފައި ވަނީ ޕާކިސްތާނާއެކު އޮންނަ ގުޅުމަކީ، ކުރިއަށް މިއޮތް ދުވަސްތަކާއި ހަފްތާތަކުގައި އެމެރިކާއިން ދިރާސާ ކުރާނެ ކަންކަމެވެ.
އޭނާ ވިދާޅުވީ ޕާކިސްތާނުން އަމަލުކޮށްފައިވާ ގޮތުން އެމެރިކާގެ މަސްލަހަތަށް ބުރޫއަރާފައި ވެއެވެ. އަދި ޕާކިސްތާނުން ތާލިބާންގެ ހަނގުރާމަވެރިންނާއި ހައްގާނީ ނެޓްވާކްގެ މީހުންނަށް މިދިޔަ އަހަރުތަކުގެ ތެރޭގައި ބޯހިޔާވަހިކަން ދީފައިވާ ކަމަށްވެސް ވިދާޅުވިއެވެ.
ތާލިބާންގެ އިސް ލީޑަރުންނާއި ހައްގާނީ ނެޓްވާކްގެ އިސް ފަރާތްތަކަކީ ޓެރަރިސްޓުންގެ ލިސްޓްގައި ހިމެނިފައިވާ މީހުންނެވެ.
އެމެރިކާގެ ރައީސް ޖޯ ބައިޑެން ވެރިކަމަށް ވަޑައިގަތްފަހުން އަދި، ޕާކިސްތާންގެ ބޮޑު ވަޒިރު އިމްރާން ޚާނާ ފޯނުން ގުޅުއްވައި ވާހަކަ ދައްކަވާފައެއް ނުވެއެވެ.
