އިންޑިއާގެ ވެކްސިން އުފައްދާ މިންވަރު އަރަނި ވުމުން އަންނަ މަހުން ފެށިގެން ވެކްސިން އެކްސްޕޯޓް ކުރަން ފަށާނެ ކަމަށް އިންޑިއާއިން ބުނެފިއެވެ. އިންޑިއާގައި ކޮރޯނާ ވައިރަސް ބާރަށް ފެތުރުގެން ދިއުމުން ރައްޔިތުންނަށް ދޭވަރަށް ގައުމުގައި ވެކްސިން ނެތުމުން އިންޑިއާއިން ވަނީ ވެކްސިން އެކްސްޕޯޓް ކުރުން ހުއްޓާލާފައެވެ.
މިހާރު އިންޑިއާއިން ވެކްސިން އުފައްދާ މިންވަރު މަހެއްގެ މައްޗަށް 300 މިލިއަނަށް އިތުރު ވެފައި ވެއެވެ.
އިންޑިއާއިން ބުނެފައި ވަނީ އޮކްޓޯބަރުން ފެށިގެން ދެކުނު އޭޝިއާ ސަރަހައްދުގެ ގައުމުތަކަށާއި ދުނިޔޭގެ ވެކްސިން ބެހުމުގެ ނިޒާމު ކޯވެކްސް އަށް ވެކްސިން ފޯރުވައިދޭން ފަށާނެ ކަމަށެވެ.
ލަފާ ކުރެވޭ ގޮތުގައި ކުރިއަށް އޮތް ތިން މަސްތެރޭގައި އިންޑިއާގެ ވެކްސިން އުފައްދާ މިންވަރު އަހަރު ނިމޭއިރު އެއް ބިލިއަނަށް އަރާނެއެވެ.
އިންޑިއާއިން ވެކްސިން ބޭރުކުރުން ހުއްޓާލުމުގެ ކުރިން 100 ގައުމަކަށް 66 މިލިއަން ވެކްސިން ފޯރުވައި ދީފައި ވެއެވެ.
އިންޑިއާގެ އަމާޒަކީ އަހަރު ނިމޭއިރަށް އެގައުމުގެ 944 މިލިއަން މީހުންނަށް ވެކްސިން ފުރިހަމަ ކޮށް ނިންމުމަށެވެ. މިހާރު އެއްވެކްސިން ޖަހާފައިވާ މީހުންގެ އަދަދު 64 އިންސައްތައަށް އަރައެވެ. އަދި ދެ ޑޯޒް ޖަހާފައިވާ މީހުން 22 އިންސައްތައަށް އަރައެވެ.
