އިންޑިއާއަށް ސަލާމަތީ ގޮތުން ދިމާވެފައިވާ އެންމެ ބޮޑު ދެ ގޮން ޖެހުމަކީ، ޗައިނާއިން އިންޑިއާގެ ސަރަހައްދަށް އަރައިގެންފައި ވުމާއި އަފްޣާނިސްތާންގެ ސަރުކާރު ބަދަލުވުން ކަމުގައި އިންޑިއާގެ ފޮރުން ސެކްރެޓަރީ ހަރްޝްވަރްދަން ޝްރިންގްލާ ވިދާޅުވެއެވެ.
ޖޭޕީ މޯރގަންގެ އިންވެސްޓް އިންޑިއާ ސަމިޓްގައި ވާހަކަ ދައްކަވަމުން އޭނާ ވިދާޅުވީ، އިންޑިއާއާއި ޗައިނާގެ ދެމެދުގެ ގުޅުން ރަނގަޅުވާނީ ޗައިނާއިން ލައިން އޮފް ކޮންޓްރޯލްގައި އަމަލު ކުރާ ގޮތެއްގެ މައްޗަށް ބަލައިގެންވެ. އިންޑިއާއިން އެދިފައި ވަނީ ޗައިނާއިން ލައިން އޮފް ކޮންޓްރޯލަށް އިހުތިރާމުކޮށް ޗައިނާ ސިފައިން ފަހަތަށް ޖައްސާލުމަށެވެ.
އަފްޣާނިސްތާނާ ބެހޭ ގޮތުން ވާހަކަ ދައްކަވަމުން އޭނާ ވިދާޅުވީ އިންޑިއާއިން ބާރުއަޅާނީ އދގެ ސަލާމަތީ މަޖިލީހުގެ 2593 ގަރާރާ އެއްގޮތަށް އަފްޣާނިސްތާންގައި ޓެރަރިސްޓުން ތަމްރީން ކުރުމަށާއި އެމީހުންނަށް ބޯހިޔާވަހޖިކަން ނުދިނުމަށެވެ.
އިންޑިއާއިން އަފްޣާނިސްތާންގެ އިންސާނީ އެހީދިނުމުގެ ހާލަތު ބަލަމުންދާކަމަށްވެސް ޝްރިންގްލާ ވިދާޅުވިއެވެ.
