ޕްރޮގްރެސިވް ކޯލިޝަނުން މާލޭގައި ސިލްސިލާކޮށް މިހާރުކުރިއަށް ގެންދާ މުޒާހަރާ މިރޭ ވެސް ކުރިއަށް އެބަ ގެންދެއެވެ.
މާލޭގެ އެކި ސަރަހައްދުގައި އެ ކޯލިޝަނުން މުޒާހަރާ ކުރަމުންދާ އިރު، މިރޭގެ މުޒާހަރާ ވެސް ފަށާފައިވަނީ ޕީޕީއެމް އޮފީސް ދޮރުމަތިން ނެވެ.
އިންސާފު ޤާއިމްކުރުމަށް ގޮވާލާ ކުރިއަށް ގެންދާ މި މުޒާހަރާގައި އިސްކޮށް ހުންނެވީ ޕީޕީއެމްގެ ނާއިބް ރައީސް މުހައްމަދު ޣައްސާން މައުމޫން އެވެ.
މުޒާހަރާގެ ބައިވެރިންގެ ތެރެއިން އެއްބަޔަކު މަޖީދީ މަގު ޗާންދަނީ މަގު ހަތަރުއަގޮޅި ކަންމަތީގައި ތިބިއިރު، އަނެއްބަޔަކު ތިބީ ސޯސަންމަގު ކައިރީގަ އެވެ. ރައީސް ޔާމީން މިނިވަން ކުުރުމަށާއި އަދުލު އިންސާފު ގާއިމް ކުރުމަށް ގޮވާލާ މުޒާހަރާ ކުރަމުންދާ އިރު، ފުލުހުން އަންނަނީ މުޒާހަރާގެ ބައިވެރިން މުޒާހަރާ ހުއްޓާލުމަށް އަންގަމުން ނެވެ. އަދި ހުއްޓާނުލާ، ފުލުހުންގެ އަމުރަށް ނުކިޔަމަންތެރި ވެއްޖެ ނަމަ، ބާރުގެ ބޭނުން ކުރާނެ ކަމަށް ވެސް އަންނަނީ ބުނަމުން ނެވެ.
