އިންޑިއާއިން ބައިވެރިވާ ކުއޯޑްގެ މަގްސަދުތަކާ ބެހޭ ގޮތުން އިންޑިއާގެ ފޮރިން ސެކްރެޓެރީ ތަފްސީލު ދެއްވައިފިއެވެ. އެމެރިކާއިން ވަނީ ކުއްލި ގޮތަކަށް އޮސްޓްރޭލިއާއާއި ޔޫކޭއާ ގުޅިގެން އައުކަސްގެ ނަމުން އަސްކަރީ ގުޅުމުގެ ޖަމާއަތެއް އުފައްދާފައެވެ. އަދި މި ޖަމާއަތާ ބެހޭ ގޮތުން އިންޑިއާގައި އުފެދުނު ބައެއް ކަންކަން ސާފުކޮށްދެއްވުމަށް އެމެރިކާގެ ދިފާއީ ވަޒީރުވެސް ވަނީ ނިއުދިއްލީއަށް ފޯނުން ގުޅުއްވައި މަސްއޫލުވެރިންނާ ވާހަކަ ދައްކަވާފައެވެ.
އިންޑިއާގެ ފޮރިން ސެކްރެޓަރީ ހަރްޝްވަރްދަން ޝްރިންގްލާ ވިދާޅުވަނީ، ކުއޯޑަކީ އޭޝިއާ ޕެސިފިކްގެ ކަންކަމަށް އުފައްދާފައިވާ އިއްތިހާދެއް ކަމަށެވެ. އަދި މިއީ އަސްކަރީ ގުޅުމެއް ނޫން ކަމަށެވެ. މިއާ ޚިލާފަށް އައުކަސްއަކީ އަސްކަރީ ގުޅުމެއް ކަމަށެވެ.
މީޑިއާ ރިޕޯޓްތަކާ ޙަވާލާދީ ޝްރިންގްލާ ވިދާޅުވީ އޮސްޓްރޭލިއާއިން ބުނާ ގޮތުން މި ގައުމުތަކުގެ ބޭނުމަށް އޮސްޓްރޭލިއާއިން މަސައްކަތް ކުރަނީ ނިއުކްލިއަރ އިން ދުއްވާ ސެބްމެރިނެއް އުފައްދާށެވެ. އަދި މީގައި ނިއުކްލިއަރ ހަތިޔާރެއް ނުހުންނާނެއެވެ. އެހެންވެ، މިއީ އޮސްޓްރޭލިއާގެ ބައިނަލްއަގްވާމީ މުއާހަދާތަކާ ޚިލާފް އަމަލެއް ކަމުގައިވެސް ނުވާނެ ކަމަށެވެ.
އޮސްޓްރޭލިއާއިން މިކަން އިއުލާން ކުރުމުން އިންޑޮނޭޝިއާއި ރަޝިޔާއިން ވަނީ ނުތަނަވަސްކަން ފާޅުކޮށްފައެވެ. ފްރާންސްއިން ވަނީ އޮސްޓްރޭލިއާއާއި ޙަވާލުކޮށްފައި އޮތް ސެބްމެރިން ބިނާ ކުރުމުގެ 66 ބިލިއަން ޑޮލަރުގެ ކޮންޓްރެކްޓްވެސް އުވާލާފައެވެ.
