މިސައިލް އުފެއްދުމުގެ ދާއިރާގައި އިންޑިއާއިން އަމިއްލަ ފުދުންތެރިކަން ޙާސިކޮށްފައިވާ ކަމަށް އިންޑިއާގެ ޑިފެންސް ރިސަރޗް އޮގަނައިޒޭޝަނުން ބުނެއެވެ. 1980އާއި 90ގެ އަހަރުތަކުގައި އިންޑިއާއިން މަސައްކަތް ކޮށްފައި ވަނީ އަމިއްލައަށް މިސައިލް އުފެއްދުމުގެ މަސައްކަތުގައި ކުރިއަށް ދާށެވެ.
ޖަވާހަރް ލާލް ނެހްރޫ ޔުނިވަރސިޓީގައި ވާހަކަ ދައްކަވަމުން ޑިފެންސް ރިސަރޗް އޮގަނައިޒޭޝަންގެ ޑިރެކްޓަރ ސަތީޝް ރެއްޑީ ވިދާޅުވީ އެއްވެސް ގައުމަކުން އަމިއްލަ ފައިމައްޗަށް ތެދުވާން ބޭނުން ނަމަ، އެ ގައުމަކަށް ޖެހޭނީ ކުރިއަރާފައިވާ ޓެކްނޮލޮޖީގެ ދާއިރާގައި މަސައްކަތް ކުރާށެވެ.
އޭނާ ވިދާޅުވީ އިންޑިއާއިން އުފައްދާފައިވާ ފަސް މިސައިލް، ޕްރިތުވީއާއި އަގްނީއާއި އާކާޗްއާއި ތްރިޝޫލްއަދި ނާގްއަކީ އިންޑިއާގެ އިންޓަރގްރޭޓޭޑް މިސައިލް ސިސްޓަމް ޕްރޮގްރާމްގެ ތެރޭގައި ހިމެނޭ މިސައިލްތައް ކަމަށެވެ. އަދި މި މިސައިލްތައް ތަރައްގީ ކުރުމުގައި ކުރީގެ ރައީސް އޭޕީޖޭ އަބްދުލް ކަލާމްގެ ޙިއްސާ ވަރަށް ބޮޑުކަމުގައި އޭނާ ފާހަގަ ކުރެއްވިއެވެ.
އަބްދުލް ކަލާމް މަޝްހޫރުވެފައި ވަނީ މިސައިލް މޭންގެ ނަމުންނެވެ.
އިންޑިއާއިން ތައްޔާރުކޮށްފައިވާ އަމިއްލަ މިސައިލްތަކަކީ، ބޭރުން އަންނަ މިސައިލްއަށް ހުރަސްއަޅައި އެ މިސައިލް ހަލާކުކޮށްލުމުގެ ކުޅަދާނަކަން ލިބިފައިވާ މިސައިލްކަމުގައި އޭނާ ވިދާޅުވިއެވެ.
