އިންޑިއާގައި އިއާދަކުރަނިވި ހަކަތައިގެ ދާއިރާއިން ވާދަވެރިކަމެއް އުފެދިއްޖެއެވެ. ރޮއިޓާޒްއިން ލަފާ ކުރާ ގޮތުގައި ކުރިއަށް އޮތްތާނގައި އިންޑިއާގައި ސޯލާ ހަކަތައިގެ ޕްލާންޓްތަކާއި އިއާދަކުރަނިވި ހަކަތައިގެ ޕްލާންޓައް އުފެއްދުމުގެ ވިޔަފާރިއަށް ބޮޑު ކުރިއެރުމެއް ލިބިގެންދާނެއެވެ.
ދުނިޔޭގެ ދެވަނައަށް އެންމެ ބައިބޯ ގައުމުން އަމާޒު ހިފާފައި ވަނީ 2030އާ ހަމައަށް އިންޑިއާގައި ހަތަރު ގުނައަށް އިއާދަކުރަނިވި ހަކަތަ އުފެއްދުން އިތުރުކޮށް، 450 ގިގަވޮޓް ކަރަންޓް އިއާދަކުރަނިވި ވަސީލަތްތަކުން އުފެއްދުމަށެވެ.
އިންޑިއާގެ މިމަގްސަދު ހާސިލުކުރުމަށްޓަކައި އެގައުމުގެ އެންމެ ބޮޑު ދެ ސާދާގަރުން ވަނީ ވާދަ ޖަހަން ފަށާފައެވެ.
ބަނދަރާއި އެއަރޕޯޓްތަކާއި ދަނގަނޑު އުފެއްދުމުގެ ދާއިރާގައި ހަރަކާތްތެރިވާ ސާދާގަރު، ގައުތަމް އަދަނީގެ ކުންފުނިން އިއުލާން ކޮށްފައި ވަނީ ދިހަ އަހަރުގެ ތެރޭގައި 20 ބިލިއަން ޑޮލަރު އިއާދަކުރަނިވި ހަކަތައަށް ހޭދަ ކުރާނެ ކަމަށެވެ. އަދި އަދަނީގެ ހުރިހައި ބަނދަރެއްގެ ހަކަތަ އުފެއްދުންވެސް ސޯލާއަށް ބަދަލު ކުރާނެ ކަމަށެވެ.
މުކޭޝް އަމްބާނީ އިޢުލާން ކޮށްފައި ވަނީ ތިން އަހަރުގެ ތެރޭގައި 10 ބިލިއަން ޑޮލަރު އިއާދަކުރަނިވި ހަކަތައިގެ ދާއިރާއިން އިންވެސްޓް ކުރާނެ ކަމަށެވެ.
