ކެނެޑާއާއި ޗައިނާއާ ދެމެދު ދިގު ދެމިގެން ދިޔަ ސިޔާސީ ޒުވާބުތަކެއް ހިންގުމަށް ފަހު ކެނެޑާއިން ވަނީ ވާވޭގެ ފައިނޭންޝަލް އެގްޒެކްޓިވް، މެންގް ވެންޒޯ މިނިވަން ކޮށްފައެވެ. ޗައިނާ ސަރުކާރުން ފޮނުވި މަތިން ދާބޯޓެއްގައި އޭނާ ވަނީ ޝެންހާއީގެ އިންޓަރނޭޝަނަލް އެއަރޕޯޓަށް ފައިބާފައެވެ. ޗައިނާއިން އޭނާއަށް ކިޔާފައި ވަނީ ރަތް ދޫލައިގެ މަރުހަބާއެކެވެ.
ޗައިނާއިން ވެސް ވަނީ އެގައުމުގެ ޖަލުތަކުގައި ބަންދުކޮށްގެން ގެންގުޅު ކެނެޑާގެ މަތީ ފެންވަރުގެ ދެ ވިޔަފާރިވެރިން ކަމަށްވާ މައިކަލް ކޮވްރިގްއާއި މިޝޭލް ސްޕެވޯރު މިނިވަންކޮށްފައެވެ.
ކެނެޑާ ސަރުކާރުން ބުނާ ގޮތުގައި ޗައިނާގެ އެކި ޖަލުތަކުގައި އަދިވެސް ކެނެޑާގެ 119 މީހަކު ޝަރީއަތަކާ ނުލައި ބަންދުކޮށްފައި އެބަތިއްބެވެ.
ކެނެޑާ ދެމީހުން ޗައިނާއިން ބަންދުކޮށްގެން ގެންގުޅުނީ ތިން އަހަރު ދުވަސް ވަންދެންނެވެ. އަދި ކެނެޑާގައި ވާވޭގެ މެންގ ބަންދުކޮށްފައި ބެހެއްޓީ ގާތްގަނޑަކަށް އެއްހާސް ދުވަސް ވަންދެންނެވެ.
