ޗައިނާ ޕާކިސްތާން އިކޮނޮމިކް ކޮރިޑޯ (ސީޕެކް)ގެ ޕްރޮޖެކްޓްތަކުގެ ތެރޭގައި ހިމަނައިގެން ކަރާޗީގެ އައްސޭރިފަށް ތަރައްގީ ކުރުމަށް ޚާއްސަ މަޝްރޫއަކަށް ޕާކިސްތާން ސަރުކާރުން ރުހުން ދީފިއެވެ. ޕާކިސްތާން ސަރުކާރުން ބުނާ ގޮތުން ކަރާޗީގެ އައްސޭރިފަށް ތަރައްގީ ކުރެވިގެން ދިއުމުން މުޅި ކަރާޗީގެ ތަރައްގީއަށް މީގެ އަސަރު ކުރާނެއެވެ.
ކަރާޗީގެ މަލަމަތި ތަރައްގީ ކުރުމަށް ހޭދަ ކުރާނީ ސީދާ ޗައިނާއިންނެވެ. މީގެ ޖުމުލަ އަގު 3.5 ބިލިއަން ޑޮލަރަށް އަރާނެ ކަމަށް ބުނެފައި ވެއެވެ.
ކަރާޗީގެ މަލަމަތި ތަރައްގީ ކޮށް ނިމޭއިރު ބަނދަރުގައި އިތުރު ބޯޓްތައް އަޅާނެ މަގަތުފާލަމާއި މަސްވެރިކަން ކުރާ އުޅަނދުތަކަށް ވަކި ބަނދަރަކާއި ކައިރީގައި އޮންނަ މަނޯރާ އައިލެންޑްސްއާ ކަރާޗީ ބްރިޖަކުން ގުޅުވާލުން ހިމެނެއެވެ.
ކަރާޗީގެ މަލަމަތި ތަރައްގީ ކުރުމަށް ބޭނުންކުރާ ސަރަހައްދަކީ މަސްވެރިންގެ އާބާދީއެއް ދިރިއުޅޭ ސަރަހައްދެކެވެ. މިތާގެ ބައި މިލިއަން މީހުންގެ އާބާދީ އެހެން ތަނަކަށް ހިޖުރަ ކުރުވުން ހިމެނެއެވެ. މިސަރަހައްދުގެ ޗަސް ބިންވެސް ހިއްކުމަށްޓަކައި ސަރުކާރުން ވަނީ 1.5 އޭކަރުގެ ބިންވެސް ސަރުކާރަށް ނަގާފައެވެ.
މިތަރައްގީއާއެކު ކަރާޗީ ވެގެންދާނީ ދުނިޔޭގެ ބަނދަރުތައް ހަދާފައިވާ ބޮޑެތި ސިޓީތަކާ އެއް ފެންވަރުގެ ސިޓިއަކަށެވެ.
