ޗައިނާއިން ބޮޑެތި މީޑިއާ ކުންފުނިތައް ކޮންޓްރޯލް ކުރުމަށް މަސައްކަގތް ކުރަމުންދާތީ އަލީބާބާ ކުންފުނިން ގަނެފައިވާ މީޑިއާ ކުންފުނީގެ ޙިއްސާތައް ވިއްކާލަން ނިންމައިފިއެވެ. ޗައިނާ ކޮމިއުނިސްޓް ޕާޓީން ބޮޑެތި ކުންފުނިތައް ކަމަށްވާ އަލީބާބާއާއި ޓެންސެންޓާއި ބައިޑޫފަދަ ކުންފުނިތައް ކޮންޓްރޯލް ކުރުމަށް ފިޔަވަޅުތައް ތައާރަފް ކުރުމަށް މަސައްކަތްތަކެއް ފަށާފައި ވެއެވެ.
އަލީބާބާއިން ވިއްކާލަން ނިންމާފައި ވަނީ އެކުންފުނިން ގަނެފައިވާ މެންގޯ އެކްސެލެންޓް މީޑިއާ ކުންފުނީގެ ޙިއްސާތަކެވެ. މިކުންފުނިން ހިންގާ މެންގޯ ޓީވީއަކީ، މަގްބޫލު ރިއަލިޓީ ޝޯތަކެއް ގެނެސްދޭ ޓީވީ އެކެވެ.
މެންގޯ ޓީވީގެ ޙިއްސާ އަލީބާބާ ކުންފުނިން ގަނެފައި ވަނީ މީގެ ހަތް މަސް ކުރިންނެވެ.
1999ގައި ޖެކް މާ އުފެއްދި އަލީބާބާއަށް ޗައިނާއިން ވަނީ ސިޔާސީ އަދި އިދާރީ ފިއްތުންތަކެއް ކުރިމަތިކޮށްފައެވެ. މި ފިޔަވަޅުތަކަކީ ޗައިނާއިން މިދިޔަ އަހަރުން ފެށިގެން އިންޓަރނެޓާއި މީޑިއާއާ ދެކޅަށް ފަށާފައިވާ ފިޔަވަޅުތަކުން ބައެކެވެ.
ޑިސެމްބަރު މަހު ޗައިނާ ރައީސް ޝީ ޖިންޕިންގ ވިދާޅުވެފައި ވަނީ އިންޓަރނެޓް ކުންފުނިތަކާ ދެކޮޅަށް އަޅާ އެންޓި މޮނޮޕޮލީ ފިޔަވަޅުތަކަކީ 2021ގައި އަޅާނެ އެންމެ މުހިންމު ފިޔަވަޅުތައް ކަމަށެވެ. އަލީބާބާ ކުންފުންޏާ ދެކޮޅަށް ތަހުގީގު ފަށާފައި ވަނީ އޭގެ ދުވަސްކޮޅެއް ފަހުންނެވެ. ފަހުން 2.8 ބިލިއަން ޑޮލަރުން އަލީބާ ޖުރިމާނާ ކޮށް، ކުންފުނި ކުޑަ ކުރުމަށް ކޮމިއުނިސްޓް ޕާޓީން އެންގިއެވެ.
