އިޓަލީވިލާތުން އަފްޣާނިސްތާންގެ ތާލިބާން ސަރުކާރު ބަލައި ނުގަންނާނެ ކަމަށް ބުނެފިއެވެ. އިޓަލީގެ ފޮރިން މިނިސްޓަރ ލޫގީ ޑީ މާއިއޯ ވިދާޅުވީ ތާލިބާނުން އައްޔަން ކޮށްފައިވާ 17 ވަޒީރުންނަކީ ޓެރަރިސްޓުން ކަމަށާއި އެފަދަ ބަޔަކު ބަލައި ގަތުމަކީ މުސްތަހީލު ކަމެއް ކަމަށެވެ.
ތާލިބާނުން ވެރިކަމަށް އައިތާ 45 ދުވަސްވީ އިރު އަދިވެސް އެއްވެސް ގައުމަކުން ތާލިބާންގެ ސަރުކާރު ބަލައި ގެންފައެއް ނުވެއެވެ.
އިޓަލީ ފޮރިން މިނިސްޓަރ ވިދާޅުވިގޮތުގައި ތާލިބާންގެ ސަރުކާރު ބަލައި ނުގަތަސް، އަފްޣާނިސްތާން ރައްޔިތުންނަށް ބައިނަލްއަގްވާމީ ޖަމުއިއްޔާތައް މެދުވެރިކޮށް ދޭން ޖެހޭ އެހީތައް ދޭންވާނެއެވެ. އަދި ސަރަހައްދުގެ ގައުމުތަކަށް ރެފިއުޖީން ބޭރުވިޔަ ނުދިނުމަށާއި ޓެރަރިޒަމްގެ ހަމަލަތައް އާންމު ވިޔަ ނުދިނުމަށް މަސައްކަތް ކުރަންވާނެ ކަމަށްވެސް އޭނާ ވިދާޅުވިއެވެ.
