ޗައިނާއިން ނުރައްކާތެރި މަހާ ބޮމެއް ތައްޔާރުކުރަމުންދާ ކަމަށް އިނގިރޭސި ސަން ނޫހުން ބުނެއެވެ. މި ބޮމަކީ، އަޑަށް ވުރެން ބާރަށް ދަތުރުކުރާ މިސައިލެއްގައި ފޮނުވާލާ، އޭގެ ކެމިކަލް ގޮވުމާއެކު މުޅި ސިޓީއެއް އެއްކޮށް އަނދިރިކޮށްލާ ވަރުގެ ނުރައްކާތެރި ބޮމެކެވެ.
މި ބޮން ދަތުރުކުރާ މިސައިލަކީ، ގަޑިއަކު 4600 މޭލުގެ ބާރުމިނުގައި ދަތުރުކުރާ މިސައިލެކެވެ. އަޑަށް ވުރެން ހަ ގުނަ ބާރު މިނުގައި ދަތުރުކުރާ މި މިސައިލް ދެ ހާސް މޭލު ދުރުގައި އޮންނަ އަމާޒުފަތްގަނޑުތަކަށް ފޮނުވާ ލެވެއެވެ.
މި މިސައިލްގެ ބޭނުމަކީ ސިޓީއެއްގެ މައްޗަށް މި ބޮން ވައްޓާލުމާއެކު އެސިޓީއެއްގެ މުވާސަލާތު ހުއްޓުވައި އެތަނެއް ގެ ކަރަންޓް ކަނޑާލައި މުޅި ތަން އަނދިރިކޮށް ލުމެވެ.
ބެއިޖިންގ ގައި ހުންނަ ޗައިނާ އެކަޑެމީ އޮފް ލޯންޗް ވެހިކަލް ޓެކްނޮލޮޖީގެ ރިސާޗް ޓީމުން ބުނާ ގޮތުން މި މިސައިލް ދުނިޔޭގެ ވައިގެ ފަށަލައިން ބޭރެއް ނުވާނެއެވެ. އެއީ ޖައްވުގައި ބަހައްޓާފައިވާ ކުއްލި އިންޒާރު ފޮނުވާލާ ސެޓެލައިޓްތަކަށް އޭގެ ހަރަކާތްތައް އަންގައި ނުދިނުމުގެ ގޮތުންނެވެ.
މިމަސައިލް ޖެހުމާއެކު ދެ ކިލޯމީޓަރުގެ ސަރަހައްދުގައި ހިމެނޭ މުވާސަލާތީ ސާމާނުތައް ވަގުތުން މުރަނަކޮށްލާނެއެވެ. މި މިސައިލްގެ އެންމެ ކުޅަދާނަކަމަކީ، ދުޝްމަނަށް މި މިސައިލް އަންނަ ކަން ނޭނގުން ކަމަށްވެސް ޗައިނާ ސައިންޓިސްޓުން ބުނެއެވެ.
އެމެރިކާގެ ތަޖުރިބާކާރުން ވިދާޅުވާ ގޮތުގައި ޗައިނާއިން ވަނީ އެމެރިކާއަށް ނުރައްކާވާފަދަ އަޑަށް ވުރެން ބާރަށް ދަތުރުކުރާ ނިއުކުލިއަރ ހިމެނޭ މިސައިލްތައް މިހާރުވެސް ބަހައްޓާފައެވެ.
މިދިޔަ ޑިސެމްބަރުގައި ޗައިނާ ސައިންޓިސްޓުން ވަނީ ގަޑިއަކު 12 ހާސް މޭލުގެ ބާރުމިނުގައި ދަތުރުކުރާ މިސައިލް އިންޖީނެއްވެސް ތަޖުރިބާ ކޮށްފައެވެ. އެމެރިކާގެ ލަފައަކީ ކުރިއަށް އޮތް 15 އަހަރުގެ ތެރޭގައި ޗައިނާއިން ދުރު ހިސާބުގައި ހަނގުރާމަ ކުރުމަށް ކުޅަދާނަވާނެ ކަމަށެވެ.
