ވެލާނާ އިންޓަނޭޝަނަލް އެއާޕޯޓްގައި މަސައްކަތް ކުރާ ދިވެހި ރެޕެއްގެ އަތުން އިންޓަނޭޝަނަލް ޓާމިނަލްގެ އެރައިވަލް ގޭޓް ކައިރިއަށް ބަނގުރާ ފުޅިއެއް ވެއްޓުމުން، އޭނާ ފިލައިފިއެވެ.
އެނގިފައިވާ ގޮތުގައި ފަތުރުވެރިން ޓާމިނަލް އިން ނިކުންނައިރު ރެޕުން ތިބޭ ސަރަހައްދުގައި އުޅުނު ރެޕެއްގެ އަތުން ބަނގުރާ ފުޅިއެއް އެސަރަހައްދަށް ވެއްޓުމާއިއެކު ބަނގުރާ ފުޅި ވަނީ ތަޅައިގެން ގޮސްފައެވެ. ބަނގުރާ ފުޅި ތަޅައިގެން ދިއުމާއިއެކު އޭނާ ވަނީ އެސަރަހައްދު ދޫކޮށް ގޮސްފައެވެ.
ބަނގުރާ ފުޅިއެއް ވެއްޓި ތަޅައިގެން ދިއުމުން އެސަރަހައްދުގައި އެއާޕޯޓްގެ މުވައްޒަފުންނާއި ފުލުހުންނާއި ސިފައިން ވެސް ހަރަކާތްތެރިވިއެވެ.
ބަނގުރާ ފުޅި ތަޅައިގެން ދިޔަތާ އިރުކޮޅެއް ތެރޭގައި އެއާޕޯޓް މުވައްޒަފުން ވަނީ އެސަރަހައްދު ސާފުކޮށްފައެވެ.
މިމައްސަލަ އާއި ގުޅިގެން ފުލުހުންގެ ބަހެއް އަދި ނުލިބެއެވެ.
