ތާލިބާންގެ ވެރިކަމުގައި ޕާކިސްތާނުގެ ހަނަގުރާމަވެރިން ކަޝްމީރުގައި ހަނގުރާމަ ކުރުމަށް އަފްޣާނިސްތާނު މެދުވެރިކޮށް ކަޝްމީރަށް ވަންނާނެ ކަމަށް އިންސާނީ ހައްގުތަކާ ބެހޭ އދގެ މަޖިލީހުގެ 48 ވަނަ ސެޝަންގައި ކައުންސިލްގެ ސަމާލުކަމަށް ގެނަސްފިއެވެ.
ޔޫރަޕިއަން ފައުންޑޭޝަން ފޯރ ސައުތު އޭޝިއަން ސްޓަޑީޒް (އެފްސާސް)އިން ބުނި ގޮތުގައި ތާލިބާނުން އަފްޣާނިސްތާން ހިފުމުން އޭގެ ނުރައްކާ ކަޝްމީރަށް ފޯރާނެއެވެ. މިމައްސަލާގައި ވާހަކަ ދެއްކެވީ އެފްސާސްގެ ޑައިރެކްޓަރ ޖުނައިދު ޤުރައިޝީއެވެ. އޭނާއަކީ ކަޝްމީރު މީހެއްވެސް މެއެވެ.
އޭނާ ވިދާޅުވީ 1989ގައި ސޯވިއެޓް ޔޫނިއަންއިން އަފްޣާނިސްތާން ދޫކޮށް ދިއުމުން ހަނގުރާމަވެރިން ކޮންމެވެސް އެހެން ދިމާއަކަށް ހޭރިއާ ކުރަން ޖެހުނެވެ. އެ ދިމާއަކަށްވީ ކަޝްމީރެވެ. މިހާރު 32 އަހަރު ފަހުން އެމެރިކާ ސިފައިން ފައިބައިގެން ދިއުމުން ކުލީ ހަނގުރާމަވެރިންނަށް ވަނީ ވަޒީފާ ގެއްލިފައެވެ. އެމީހުން ތިބީ ބޮޑު ބާރެއް ބަލިކޮށްލެވުނީތީ އެކަމުގެ އުފަލުގައެވެ.
ޖުނައިދު ވިދާޅުވިގޮތުގައި، 1990ގެ އަހަރު ތަކުގައި ފެނިގެން ދިޔައީ ޕާކިސްތާންގެ ޖާސޫސީ އިދާރާ އައިއެސްއައި އިން ތަމްރީން ކޮށްފައިވާ މީހުން ކަޝްމީރަށް ފޮނުވައިގެން ހަނގުރާމަ ކުރި މަންޒަރެވެ. އޭނާ ވިދާޅުވިގޮތުގައި މިހާރުގެވެސް ބިރަކީ، ކުރިން ކަންކަންތައް ހިނގި ފަދައިން ހަނގުރާމަވެރިން ފޮނުވައިގެން ކަޝްމީރުގައި ހަނގުރާމަ ކުރުވަފާނެ ކަމުގެ ބިރެވެ.
ކަޝްމީރު މީހުންނަކީ އަފްޣާނިސްތާން މީހުން ދެކެ ލޯބިވާ ބައެއް ކަމަށް ވިދާޅުވެ، ޖުނައިދު ވިދާޅުވީ އެކަމަކު ތާލިބާނާ މެދު ކަޝްމީރު މީހުންގެ މާ ބޮޑު ކުލުނެއް ނެތް ކަމަށެވެ.
އދގެ ހިއުމަން ރައިޓްސް ކައުންސިލަށް އޭނާ ގޮވާލެއްވީ، ޕާކިސްތާނަށް އެފަދަ ފުރުސަތެއް ފަހިވިޔަ ނުދިނުމަށެވެ.
