ބޮލީވްޑްގެ މަޝްހޫރު ފިލްމީ ތަރި ޕަރިނިތީ ޗޯޕްރާ ދިވެހިރާއްޖޭގައި ސްކޫބާ ޑައިވް ކުރާ ވީޑިއޯއެއް ދެ ލައްކައަށްވުރެ ގިނަ މީހުންބަލައިފިއެވެ. އަދި ގިނަ ބަޔަކު އެއަށް "ކޮމެންޓް" ކޮށްފައި ވެސް ވެއެވެ.
ފީނުމަށް ޝައުގުވެރިކަން ހުންނަ ޕަރިނިތީ ޗޯޕުރާ އޭނާގެ އާއިލާ އާއެކު ރާއްޖެ އައީ މިދިޔަ ހަފުތާގައެވެ.
ރާއްޖެ އައިސް އޭނާގެ ކޮއްކޮ ޝިވަންގް ޗޯޕްރާ އާއެކު ސްކޫބާ ޑައިވިން ދަތުރަށް ފުރުމަށްފަހު، ފީނުމަށް ބޭނުންވާ ސާމާނާއެކު ނަގާފައިވާ ފޮޓޯއެއް ހިއްސާކުރަމުން ލިޔެފައި ވެއެވެ. "ދެން އޮތް ހަތް ދުވަސް އަހަރެމެން ހޭދަކުރަނީ އެންމެ ޝައުގުވެރިވާ – ސްކޫބާ ޑައިވް ކުރުމަށް ބޯޓެއްގައި." މި ލިޔުމާއި ފޮޓޯ ހިއްސާ ކުރަމުން އޭނާ "ފޮލޯ" ކުރާމީހުންގެ ހެޔޮ ދުޢާއަށް އެދިފައިވެއެވެ.
ހޯމަދުވަހު ޕަރިނިތީ މޫދުގައި ފީނަމުންދާ ފޮޓޯއެއް ހިއްސާކުރަމުން ލިޔެފައިވަނީ " ދެން ފީނުމަށްދާ މަންޒިލަށް ދިއުމަށްޓަކައި ބޯޓު، ކަނޑުއޮޅިއެއް ހުރަސްކުރަނީ. އެ މަންޒިލަށް ދެވެންދެން ނިދުމާއި ކެއުމާއި ކުޅިވަރުގައި ވަގުތު ހޭދަކުރުމަށްފަހު ފީނުމަށް ތައްޔާރުވާންވީ،" ކަމަށެވެ.
ޕަރިނިތީގެ އިންސްޓަގްރާމު ފޮޓޯއަށް އެންމެ ފުރަތަމަ "ކޮމެންޓް" ކޮށްފައިވާ ފިލްމް އުފައްދާ ހޯމީ އަޖަދާނިޔާ ވަރަށް ކުރު ޢިބާރާތަކުން ލިޔެފައިވަނީ "ހިތް ގައިމު" އެވެ. ހޯމީ އަޖަދާނީ އަކީވެސް ސްކޫބާ ޑައިވިން އިންސްޓްރަކްޓަރެކެވެ.
މިހަފުތާގައި ޕަރިނިތީގެ އިންސްޓަރގްރާމް ގައި ހިއްސާކޮށްފައިވަނީ ރާއްޖޭގައި ފީނުމާއި ފެތުމާއި އަދި މޫދުގައި ނަގާފައިވާ ފޮޓޯތަކާއި ވީޑިއޯ ތަކެވެ. ޕަރިނިތީ އަކީ ވަރަށް ގިނައިން ދިވެހިރާއްޖެއަށް ޗުއްޓީ ހޭދަކުރަން އަންނަ ފަންނާނެކެވެ.
